ՍԱՏՄ-ն կասեցրել է «Արզնի կաթնամթերք» ընկերության արտադրամասի գործունեությունը

Սննդամթերքի անվտանգության տեսչական մարմնի (ՍԱՏՄ) ղեկավարի որոշմամբ՝ կասեցվել է «Արզնի կաթնամթերք» ՍՊԸ-ին պատկանող կաթի և կաթնամթերքի արտադրամասի գործունեությունը Երևանի Նոր Նորք վարչական շրջանում:

Տեսչական մարմնի փոխանցմամբ՝ ստուգումների ընթացքում հայտնաբերվել են սանիտարահիգիենիկ նորմերի էական խախտումներ, որոնք անհամատեղելի են սննդամթերքի արտադրության հետ։

Մասնավորապես, արձանագրվել են հետևյալ խնդիրները.

Անհամապատասխան մակերեսներ. Արտադրամասի և պահեստի պատերն ու հատակը պատրաստված չեն եղել լվացվող և ախտահանվող նյութերից, ունեցել են անհարթություններ ու վնասվածքներ։

Վնասված առաստաղ. Առաստաղի վնասված լինելու պատճառով չի ապահովվել կեղտի կուտակման և օտար մասնիկների թափվելու կանխարգելումը։

Օդափոխության և պատուհանների խնդիրներ. Բացվող պատուհաններն ու օդահեռացման համակարգը ապահովված չեն եղել միջատապաշտպան ցանցերով։

Կոյուղու համակարգ. Ջրահեռացման համակարգը նախագծված չի եղել սննդամթերքի աղտոտման ռիսկերը բացառող եղանակով։

Անձնակազմի հիգիենա. Տարածքն ապահովված չի եղել աշխատակիցների հանդերձարանով։

Սարքավորումներ և տարաներ. Սննդամթերքի հետ շփվող բեռնարկղերը պատշաճ չեն մաքրվել ու ախտահանվել, եղել են վնասված և պատրաստված չեն եղել հիգիենիկ նորմերին համապատասխանող նյութերից։

Ընկերության տնօրենին հանձնարարվել է սահմանված ժամկետում վերացնել խախտումները և արտադրական գործընթացը համապատասխանեցնել օրենսդրության պահանջներին: