Հայաստանը դարձել է «I F I A»-ի գիտնականների միջազգային ասոցիացիաների ֆեդերացիայի անդամ
15 Մայիսի 2023, 15:32
Ճարտարապետության և շինարարության Հայաստանի ազգային համալսարանի կողմից ներկայացված «Ֆիքսատորներ մետաղական ամրանների համար» գյուտի շնրոհիվ Հայաստանը դարձել է «I F I A»- ի գիտնականների միջազգային ասոցիացիաների ֆեդերացիայի անդամ:
«Արմենպրես»-ի հետ զրույցում գյուտի հեղինակ, Ճարտարապետության և շինարարության Հայաստանի ազգային համալսարանի (ՃՇՀԱՀ) Շինարարական արտադրության տեխնոլոգիայի և կազմակերպման ամբիոնի վարիչ, տեխնիկական գիտությունների դոկտոր, պրոֆեսոր, ՀՀ վաստակավոր շինարար Վարդգես Գրիգորյանը նշեց, որ այս գյուտը Քուվեյթի գիտական ակումբի և Ժնևի միջազգային ցուցահանդեսի միջև համագործակցությամբ՝ 2023 թվականի փետրվարի 12-15-ը Քուվեյթում կայացած Մերձավոր Արևելքում գյուտերի (հայտնագործությունների) 13-րդ միջազգային ցուցահանդես-մրցույթում արժանացել է արծաթե մեդալի և հավաստագրի:
Նա ուրախությամբ ասաց, որ այս անդամակցությամբ ակնկալում են, որ ապագայում Հայաստանը, ինտեգրելով այդ կառույցին, կունենա իրավունք վերցնելու այն բոլոր գյուտերի օգտակար բաժինները, որոնք կկիրառվեն ի շահ Հայաստանի:
«Նրանք մեզնից ունեն ակնկալիքներ և մենք դատարկաձեռն չենք ներկայնալու ասոցիացիաներին: Մենք ունենք մի շարք գյուտեր՝ շուրջ 21-ը մեր ամբիոնում, մենք կներկայացնենք և նրանց կփոխանցենք այն, ինչ իրենց կհետաքրքրի և հակառակը՝ կվերցնենք իրենցից այն, ինչը հետաքրքիր և կարևոր է մեր երկրի ու մեր գիտնականների համար»,-ասաց նա:
Վարդգես Գրիգորյանն ընդգծեց, որ այն երկրները, որոնք անդամ չեն այս ասոցիացիաներին, նրանց առջև դռները փակ կլինեն, իսկ Հայաստանը այս անդամակցության շնորհիվ հնարավորություն ունի բոլորովին անվճար տպագրվելու գիտական ամսագրերում և մասնակցելու կազմակերպված բոլոր կարևոր միջոցառումներին ու հանդիպումներին:
«Նշեմ մի կարևոր փաստ, որ Հայաստոնում տարեվերջին կամ մեկ տարվա ընթացքում կազմակերպությունը պատրաստվում է մեր կառավարությանը ներկայացնել առաջարկություն՝ Հայաստանում գյուտարարների գիտաժողով իրականացնելու նպատակով, որը մեծ պատիվ է մեզ բոլորիս համար: Այն Հայաստանը ավելի ճանաչելի կդարձնի շատերի՝ այդ թվում նաև գիտական աշխարհի համար»,-ասաց Գրիգորյանը:
Մասնագետը նշեց, որ ասոցացիային անդամակցությունը կրում է մշտական բնույթ, բայց այն պետությունները, որոնք ակտիվ չեն լինի և չեն բավարարի պահանջները, կզրկվեն անդամակցություննից և կհեռացվեն:
«Պետք է անպայման գիտաժողովներին ներկայանալ հետքրքիր մտքերով, գյուտերով և ելույթներով, ինչին և մենք պատրաստ ենք, այս պահին էլ կարող ենք 20 գյուտ ներկայացնել, չնայած որ յուրաքանչյուր հավաքի ժամանակ քննարկվում է մեկ գյուտ»,- ասաց գիտնականը:
Ճարտարապետության և շինարարության Հայաստանի ազգային համալսարանի Շինարարական արտադրության տեխնոլոգիայի և կազմակերպման ամբիոնի դասախոս, կրտսեր գիտաշխատող Աշոտ Մխիթարյանի խոսքով սա հիանալի հնարավորություն է ակտիվացնելու Հայաստանում գիտության ոլորտը:
«Փետրվարին, երբ մենք մասնակցում էինք Քուվեյթում տեղի ունեցած ցուցահանդեսին, այնտեղ ինձ համար որպես գիտությամբ զբաղվող երիտասարդ մարդ տեսանելի և ուրախալի էր, որ շատ երկրներ ներկայացնում են երիտասարդ գիտնականներ:
Այսինքն սա մեծ հնարավորություն է երիտասարդ գիտնականների համար, քանի որ արդեն «I F I A»- ի գլխավոր գիտաժողովի ժամանակ իրենց նախագահն ու մյուս աշխատակիցները մեզ ցույց էին տալիս այն ճանապարհային քարտեզը, որով մեր երկրների գիտնականները կարող են առաջ շարժվել: Որևէ սամանափակում չկա, նրանք ունեն շատ մեծ հնարավորություններ:
Նշեմ, որ կառույցը զբաղվում է նաև ստարտափերի աջակցությամբ, ինչը նաև մեր երկրում է ակտուալ՝ մտքից հասնել մինչև բիզնեսի արտադրության»,-ասաց Մխիթարյանը:
Երիտասարդ գիտնականը նշեց, որ մոտակա մեկ տարվա պլանը, որը ներկայացնելու են, որպեսզի ապահովեն Հայստանի ակտիվությունը, դրանում լուրջ դեր կունենա ստարտափերի ընդգրկումը, մրցույթների կազմակերպումը և նորարարությունների ներկայացումը:
«Երբ մենք համալսարանում էլ ներքին մրցույթներ ենք իրականացնում, շատ լավ գաղափարներ կան, որոնք կարելի է ներկայացնել միջազգային հանրությանը և ստանալ աջակցություններ»,- ընդգծեց մասնագետը:
Աշոտ Մխիթարյանը նշեց, որ գիտաժողովի ընթացքում մասնակցել են նաև զուգահեռ անցկացվող ցուցահանդես մրցույթին, որտեղ ծանոթացել են մի շարք գիտական աշխատանքների, որոնք իրականացվել են հենց այն մեթոդաբանությամբ, որոնք իրենք ևս ներդնում են Հայաստանում՝ մասնավորապես շինությունների տեղեկատվական մոդելավորման BIM համկարգը:
«BIM գործընթացը նպաստում է խելացի տվյալների ստեղծմանը, որոնք կարող են օգտագործվել շինությունների կամ ենթակառուցվածքների նախագծման ողջ կյանքի ընթացքում։
BIM-ն օգտագործվում է շինությունների և ենթակառուցվածքների նախագծման և փաստաթղթավորման համար(պլանավորում, նախագծում, հավաքագրում, շահագործում և սպասարկում): Շենքի յուրաքանչյուր դետալ մոդելավորվում է BIM-ով։
Մոդելը կարող է օգտագործվել վերլուծությունների համար` նախագծման տարբերակները բացահայտելու և տեսանելի լուծումներ ստեղծելու համար, որոնք կօգնեն շահագրգիռ կողմերին հասկանալ, թե ինչ տեսք կունենա շենքը ապագայում»,- ասաց Աշոտ Մխիթարյանը:
Նա ընդգծեց, որ այս նոր համակարգը հնարավորություն կտա կրճատել շինարարության տևողությունը և կանխել հետագա ծախսերի և շինարարության փուլում անխուսափելի խնդիրների առաջացումը:
Հիմա եթերում
