Գյումրիի ԲՈՒՀ-երում դիմորդների թիվն ավելացել է

Գյումրիի պետական բուհերն այս տարի ավելի շատ դիմորդներ ունեն։ Այս ցուցանիշը ցույց են տալիս դիմում-հայտերի ընդունման արդյունքները։

Գյումրիի պետական բուհերի շարքում ամենաշատ հայտագրած մասնագիտությունները, ըստ այդմ, նաև ամենաշատ հատկացված տեղերը Շիրակի պետական համալսարանն ունի։

Բայց արդեն որերորդ տարին դիմորդների թիվն ավելի պակաս է, քան հատկացված տեղերը։ 421 անվճար ու վճարովի տեղեր ունի համալսարանը, իսկ դիմորդների թիվը 103-ով պակաս է, սակայն այս ցուցանիշն աճ է գրանցել  նախորդ տարվա համեմատ։

«Շիրակի պետական համալսարանն ունեցավ 318 դիմորդ։ Անցյալ տարի մոտ 40-ով քիչ էր դիմորդների թիվը։ Ունենք մասնագիտություններ, որտեղ ունենք մրցույթ։ Ցավոք սրտի ունենք մասնագիտություններ, որտեղ մեր ուզածից քիչ էր դիմորդների թիվը, բայց ընդհանուր առմամբ արդյունքները գոհացուցիչ են»,- SHANTNEWS-ին ասել է ՇՊՀ ռեկտոր Երվանդ Սերոբյանը։