Թուրքական կազմակերպությունների հետ աշխատող ընկերությունները թշնամուն ինֆորմացիոն բազա են տալիս. Միքայել Հայրապետյան

Ընկերությունները, որոնք աշխատում են թուրքական կազմակերպությունների հետ, իրենց փաստաթղթերը ուղարկելով թուրքերին, բացահայտում են նաև հաճախորդների տվյալները՝ թշնամուն տալով մեծ ինֆորմացիոն բազա:

Այս մասին Alpha News-ի ուղիղ եթերում ասաց «Արմենիան Բիզնես Քորներ»-ի հիմնադիր Միքայել Հայրապետյանը՝ ներկայացնելով, թե ինչ խնդիրների կարող են բախվել հայկական ընկերությունները՝ աշխատելով թուրքական կազմակերպությունների հետ աշխատող ընկերությունների հետ:

««American Global Group» ընկերությունը և «Global US» ընկերությունը երբևիցե թուրքերի հետ չեն աշխատել: Եվ խորհուրդ կտամ յուրաքանչյուր ընկերության հետ աշխատելիս՝ հարց տաք, թե նրանք աշխատե՞լ են թուրքերի հետ: Տնտեսական նկատառումներով՝ մարդիկ կարող են ասել՝ Դուք ապրում ենք ԱՄՆ-ում, ու մենք ում հետ կուզենք կաշխատենք, բայց բարոյական նկատառումով՝ իմ աշխարհայացքում դա չի տեղավորվում, քանի որ ես արցախահայ եմ ու հետ եմ գնալու իմ տուն: Բայց, իմ տուն գնալու ճանապարհին ես պետք է հայամետ մտածեմ ու կարողանամ թև ու թիկունք լինեմ իմ քույրերին և եղբայրներին:

Ընկերությունները, որոնք աշխատում են թուրքական կազմակերպությունների հետ, իրենց փաստաթղթերը ուղարկելով թուրքերին, բացահայտում են նաև իրենց հաճախորդների տվյալները և տալիս են թուրքերին մեծ ինֆորմացիոն բազա, որ կարողանան նամակներ ուղարկել, ազդել մարդու գիտակցության ու ենթագիտակցության վրա»,- ասաց Հայրապետյանը:

Նա իր խոսքում ընդգծում է, որ նման թուրքամետ հայերն են Արցախը հասցրել այս օրվան:

«Թշմամուն օգնելով ու թիկունք կանգնելով՝ նման թուրքամետ հայերը մեզ հասցրին այս օրվան: Նրանք պետք է բացահայտվեն ու պատժվեն: Ես ինչպե՞ս կարող եմ նրանց հետ աշխատել, երբ իմ տուն են մտել ու քանդում են այն, եկեղեցիս են պղծում ու գերեզմաններն ավիրում: Իմ հորդորն է՝ ինչ էլ անենք, ինչ էլ աշխատենք, լավ է քիչ ունենալ, բայց փոխարենը՝ թուրքերին չհարստացնենք»,- եզրափակեց Հայրապետյանը: