Երևանի և Մոսկվայի պետական համալսարանների միջև կստորագրվի համագործակցության հուշագիր
30 Մայիսի 2023, 00:30
![](https://media.alphanews.am/wp-content/uploads/2023/05/29141836/1112018.jpg)
Երևանի և Մոսկվայի պետական համալսարանների միջև կստորագրվի համագործակցության հուշագիր։ «Արմենպրես»-ի փոխանցմամբ՝ այս մասին Ֆեյսբուքի իր էջում կատարած գրառման միջոցով տեղեկացրել է ԵՊՀ-ի ռեկտոր Հովհաննես Հովհաննիսյանը:
Նա նշել է, որ պայմանավորվածությունը ձեռք ենք բերել ՌԴ այցելության շրջանակում Մոսկվայի պետական համալսարանի ռեկտոր Վիկտոր Սադովնիչիի հետ հանդիպման ժամանակ։
«Քննարկելով համագործակցության ոլորտներն ու ուղղությունները, կարևորելով երկու համալսարանների ուսանողների ու դասախոսների փոխանակման ծրագրերը, համատեղ կրթական ու հետազոտական նախագծերը, ակադեմիական ռեսուրսների փոխանակումն ու միջոցառումների կազմակերպումը՝ պարոն Սադովնիչիի առաջարկությամբ որոշել ենք առաջիկայում իրավաբանորեն ամրագրել մեր փոխգործակցությունը»,- գրել է ռեկտորը:
Նրա խոսքով՝ համագործակցությունը կնպաստի երկու համալսարանների ակադեմիական առաջընթացին ու ընդհանուր զարգացմանը՝ խթանելով միջգիտակարգային հետազոտություններն ու նորարարությունները, մշակութային փոխանակումն ու համատեղ ջանքերի միջոցով բարձրագույն կրթության ոլորտի մարտահրավերների լուծումը: