«Հնարավորությունների սահմանում արեցին ամեն ինչ»

Հայաստանի աթլետիկայի հավաքականն ավարտել է ելույթները Եվրոպական ամառային երրորդ խաղերում: Հավաքականի գլխավոր մարզիչ Գրիգոր Բարսեղյանը, ամփոփելով հայ աթլետների մասնակցությունը, նշել է՝ մարզիկները հանդես են եկել իրենց հնարավորությունների սահմանում, իսկ արդյունքները կարելի է գոհացուցիչ համարել, գրում է Panorama.am-ը:

«Բոլոր ուժեղագույնները, բացառությամբ արագավազորդ տղաների, որոնք վնասվածքներ ունեին, մասնակցում էին մրցումներին: Թիմի մյուս առաջատարները, որոնցից սպասում էինք առանձնակի արդյունքներ, լիովին արդարացրեցին իրենց՝ Երվանդ Մկրտչյանը, Լևոն Աղասյանը, Յանա Սարգսյանը:

Կառանձնացնեի 4×400 մետր փոխանցավազքը, որին մեր հավաքականն առաջին անգամ մասնակցեց, ու թեև գրավեցինք 5-րդ հորիզոնականը, բայց ազգային ռեկորդ սահմանեցինք: Ազգային ռեկորդ սահմանեց նաև Էլլադա Ալավերդյանը 3000 մետր խոչընդատավազաքում: Ընդհանուր առմամբ մրցելույթներից գոհ եմ, հնարավորությունների սահմանում լավ հանդես եկանք, թեև վերջնարդյունքում կարող էինք ավելի բարձր հորիզոնական զբաղեցնել»,- ասում է մարզիչը:

Մարզչի խոսքով՝ Եվրոպական ամառային խաղերի արդյունքներով ձևավորվելու է Հայաստանի աթլետիկայի հավաքականը, որը մասնակցելու է Բալկանյան երկրների առաջնությանը: Եվս երկու մարզիկ՝ Երվանդ Մկրտչյանն ու Գայանե Չիլոյանը, հուլիսին Չինաստանում մասնակցելու են Համաշխարհային ուսանողական խաղերին: Առաջիկայում անցկացվելու է նաև մեծահասակների աշխարհի առաջնությունը:

ԿԳՄՍ նախարարության հաղորդմամբ, աթլետների ելույթներին մրցավայրից հետևել են նաև Հայաստանի աթլետիկայի ֆեդերացիայի նախագահ, Եվրոպայի, ԽՍՀՄ-ի ու հանրապետության բազմակի չեմպիոն, Բարի կամքի խաղերի հաղթող, Եվրոպայի ռեկորդակիր Ռոբերտ Էմմիյանը, Աթլետիկայի ֆեդերացիայի գլխավոր քարտուղար, ԿԳՄՍՆ սպորտի քաղաքականության վարչության պետ Նարինե Շահբազյանը, հավաքականի մարզիչներ ու երկրպագուներ:

Ռոբերտ Էմմիյանի խոսքով՝ Եվրոպայի թիմային առաջնությանը մասնակցելը կարևոր փորձառություն էր հայ մարզիկների համար.«Շատ ուրախ եմ, որ մեր պատվիրակությունն այսպիսի հիանալի թիմով մասնակցեց Եվրոպական ամառային երրորդ խաղերի շրջանակում առաջին անգամ անցկացվող Եվրոպայի թիմային առաջնությանը:

Ուրախ եմ, որ Հայաստանում էլ արդեն ունենք միջազգային չափանիշներին համապատասխանող վազքուղի, որն արդեն լիովին պատրաստ է: Առաջին մրցումը, որ այնտեղ կանցկացվի Համահայկական ամառային խաղերն են: Դրանից հետո կանցկացնենք Հայաստանի առաջնությունը, ապա 3-4 միջազգային մրցաշար: Ուզում եմ, որ այդ պայմանները մեզ ավելի օժանդակեն հաջողության հասնելու համար»։ 

Նրա խոսքով՝ թեև թիմային առաջնություն է, բայց մարզիկների անհատական արդյունքները շատ ոգևորող են:

«Աղասյանն առաջին տեղը գրավեց եռացատկում. շատ ուրախ եմ նրա համար: Երվանդ Մկրտչյանն ու Յանա Սարգսյանը երրորդ տեղը զբաղեցրին: Ունեցանք նաև անձնական ու ազգային ռեկորդներ: Բոլոր մարզիկներն իրենց հնարավորությունների սահմանում արեցին ամեն ինչ, որպեսզի իրենց լավ դրսևորեն: Վստահ եմ՝ երբ ունենանք լավ պայմաններ ու մեր մարզիկները բարելավեն իրենց տեխնիկական, ֆիզիկական տվյալները, էլ ավելի մեծ հաջողություններ կունենան»,- ընդգծում է Էմմիյանը:

Հայաստանի աթլետիկայի ֆեդերացիայի նախագահի խոսքով` առջևում Եվրոպայի երիտասարդների ու աշխարհի առաջնություններն են. «Գլխավոր նպատակն Օլիմպիական խաղերն են. Պետք է կարողանանք վարկանիշ ձեռք բերել: Անհրաժեշտ ամեն ինչ պետք է անել, որպեսզի շատ մասնակիցներ ունենանք: Որակյալ մարզիկներ ունենք՝ ի դեմս Լևոն Աղասյանի, Երվանդ Մկրտչյանի, Յանա Սարգսյանի, ու այլոց, որոնք կարող են վարկանիշ ձեռք բերելու»:

Ռոբերտ Էմմիյանն առանձնացնում է նաև ամերիկահայ մարզուհի Ալիսոն Հալվերսոնին, որը 2019 թվականին Հայաստանի քաղաքացիություն ստանալուց հետո, առաջին անգամ Հայաստանի հավաքականի կազմում միջազգային մրցաշարի մասնակցեց. « Բոլորիս համար հաճելի է նրա ներկայությունը մեր թիմում: Վերջերս է երեխա ունեցել, քիչ ժամանակ ունեցավ պատրաստվելու համար: Վստահ եմ՝ մյուս մրցումներում շատ ավելի լավ մարզավիճակում կլինի ու բարձր արդյունքներ կգրանցի՝ գնալով դեպի Օլիմպիական խաղեր»:

Տարբեր տարածությունների վազորդ Ալիսոն Հալվերսոնը Եվրոպական խաղերին մասնակցեց մի քանի մրցաձևերում, իսկ ամենատպավորիչը հենց 4×400 մետր փոխանցավազքում նրա վստահ ելույթն էր: Հալվերսոնի խոսքով՝ Հայաստանի հավաքականի կազմում հանդես գալն իր համար մեծ նշանակություն ունի. «Իսկապես շատ էմոցիոնալ պահ է: Գիտեմ իմ նախնիների պատմությունը, ովքեր Ցեղասպանությունից հետո գաղթել են ԱՄՆ: Գիտեմ, որ Հայաստանի համար հիմա էլ ծանր ժամանակներ են, քանի որ Արցախում պատերազմը չի ավարտվել: Ես հայ ժողովրդին մի մասնիկն եմ և դրա համար շատ ուրախ եմ: Մենք այսօր ցույց տվեցինք, որ կարող ենք հաղթել ու որ հայ ժողովուրդն ուժեղ է: Շատ եմ սիրում թիմակիցներիս: Այո, մենք նույն լեզվով չենք խոսում, բայց սպորտը միավորում է: Մենք իրար հասկանում ենք մեր էմոցիաներով, գրկախառնություններով ու խոսում ենք աթլետիկայի լեզվով»:

Հիշեցնենք՝ Լեհաստանում ընթացող Եվրոպական ամառային երրորդ խաղերի շրջանակում ավարտվել է աթլետիկայի Եվրոպայի թիմային առաջնությունը, որի արդյունքներով Հայաստանի թիմը, հանդես գալով երրորդ դիվիզիոնում, զբաղեցրել է 10-րդ հորիզոնականը:

Եվրոպական ամառային երրորդ խաղերում Հայաստան ներկայացուցիչներ կունենա նաև բռնցքամարտ, կարատե, թաեքվոնդո և հրաձգություն մարզաձևերում: