9-ամյա հայ թենիսիստը 2 ամսում մասնակցել է 6 մրցաշարի և տարել նույնքան հաղթանակ. տեսանյութ

Երազում եմ մեծ թենիսիստ դառնալ, ինչպես Ռոջեր Ֆեդերերը: Շատ եմ սիրում թենիսը, ուրիշ ոչինչ չեմ սիրում աշխարհում:

Այս մասին NEWS.am Sport-ի թղթակցի հետ զրույցում ասել է Երեւանի «Ին կորտ Ֆիզիկա» թենիսի ակումբի սան, 9-ամյա Սարգիս Ավետիսյանը, որն այս ամիս դարձել է Հայաստանի թենիսի ֆեդերացիայի գավաթի խաղարկության հաղթող։ Նախորդ 2 ամիսների ընթացքում նա մասնակցել է 6 մրցաշարի եւ տարել նույնքան հաղթանակ մենախաղում եւ զուգախաղում:

«Ես թենիս շատ եմ սիրում: 7 տարի հաճախում եմ թենիսի: Այս մարզաձեւն ինձ համար ամենակարեւորն է, թենիսից բացի, ուրիշ ոչինչ չեմ սիրում աշխարհում: Երազում եմ մեծ թենիսիստ դառնալ, լինել լավագույնը, ինչպես Ռոջեր Ֆեդերերը:

Վերջին մրցաշարերում միայն հաղթանակներ եմ տարել՝ 6 մրցաշար անընդմեջ: Շատ եմ ուրախանում, երբ հաղթում եմ, հպարտություն եմ զգում:

Առաջին անգամ կորտեր այցելել եմ  հայրիկիս հետ, որը թենիսի մարզիչ է: Հետո հեռուստացույցով դիտեցի Ռոջեր Ֆեդերերի խաղը եւ սիրեցի այս մարզաձեւը, որոշեցի, որ ես էլ պետք է թենիսիստ դառնամ: Ինձ թենիսում դուր է գալիս հարվածը գնդակին»,- ասաց 9-ամյա Սարգիսը:

Սարգիս Ավետիսյանի անձնական մարզիչը նրա հայրն է՝ «Ին կորտ Ֆիզիկա» ակումբի մարզիչ Կարեն Ավետիսյանը: Մարզիչ-հայրիկի կարծիքով, մարզաձեւի նկատմամբ 9-ամյա Սարգիսի սերը գենետիկական է:

«Թենիսի նկատմամբ սերը փոխանցվել է ընտանիքից: Նա փոքր տարիքից սպորտի մեջ է եղել: Զուհագեռ զբաղվել է թենիսով եւ ըմբշամարտով: Հետագայում որոշեց, որ ցանկանում է միայն թենիսով զբաղվել: Այս որոշումը նրանն է եղել, ստիպողաբար չի եղել: Ես նրան առաջարկել եմ, թե որն է ցանկանում շարունակել եւ բացատրել եմ, որ չի կարող զուգահեռ թենիսով եւ ըմբշամարտով զբաղվել, քանի որ շատ տարբեր մարզաձեւեր են: Նրա ընտրությունը կանգնել է թենիսի վրա:

Արդեն ունի լավ արդյունքներ: Նախորդ  մրցաշարերում միայն հաղթանակներ է տարել: «Ին կորտ Օրանժ» ակումբի մինչեւ 10-ը տարեկանների առաջնությունում չեմպիոն է դարձել: Հաղթել է Կարմիր խաչի «Դավթյան» թենիսի ակումբի գարնանային բաց առաջնությունում, «Արարատ» եւ «Ին կորտ Ֆիզիկայի» ակումբների բաց առաջնություններում: Հունիսի 27-ին մինչեւ 12 տարեկանների մեջ հաղթել է ֆեդերացիայի գավաթի խաղարկության զուգախաղում, հուլիսի 2-ին՝ ֆեդերացիայի գավաթի խաղարկությունում մենախաղում՝ մինչեւ 10-ը տարեկանների մեջ: Հուլիսի 10-ին էլ դարձել է Գյումրիի մինչեւ 10-ը տարեկանների բաց առաջնության հաղթող: Այս հաղթանակները գերազանց արդյունք են իր տարիքային խմբում:

Սարգիսի արդյունքներն այս տարի են աճել: Մինչեւ այդ, հանդես էր գալիս մինչեւ 12 տարեկանների մեջ եւ պայքարում էր իրենից 1-2 տարի ավագների հետ: Այժմ մասնակցում է 9-10-ը տարեկանների մեջ:

Սարգիսն իսկապես թենիսի մեծ սիրահար է, հեռուստացույցով ոչ մի մրցաշար բաց չի թողնում: Ապրում է այս մարզաձեւով: Փորձում է իր խաղաոճը գտնել, որը ինքս ոչ թե որպես հայր, այլ մարզիչ, նմանեցնում եմ Ֆեդերերին: Ձգտում է նմանվել:

Այս պահին չեմ կարող ասել, թե ինչպիսին կլինի նրա մարզական կարիերայի ապագան: Ամեն ինչ առջեւում է:

Շատ խնդիրներ ունենք: Ամենամեծ խնդիրը ֆինանսի հետ է կապված: Մենք շատ շնորհալի երեխաներ ունենք, հեռանկարային պատանիներ ունենք, որոնց ֆինանսական աջակցություն է անհրաժեշտ: Տարբեր տարիքային խմբերում ունենք լավ երեխաներ եւ ֆինանսական մեծ խնդիրների պատճառով չենք կարողանում այս երեխաներին միջազգային մրցաշարերում փորձ ձեռք բերելու հնարավորություն տալ: Թենիսը մեծ ֆինանս է պահանջում: Ֆեդերացիայի կողմից ունենք աջակցություն, բայց շատ քիչ է եւ չի բավականացնում տարվա կտրվածքով միջազգային մրցաշարերի մասնակցության համար: Այդ ամենի համար մեզ հարկավոր են հովանավորներ, որը չունենք: Տեղի մրցաշարերի մասնակցության համար ոչ մի ֆինանսական միջոցներ անհրաժեշտ չեն, բայց դրսի մրցաշարերը ծախսատար են»,- ասաց Կարեն Ավետիսյանը:

Տեսանյութը՝ այստեղ