Մենք՝ հայերս, պետք է ձևավորենք տեսլական այն մասին, թե ուր ենք գնում. Արման Աբովյան

Հայաստանի ցանկացած ինտեգրում այսպես կոչված թյուրքական աշխարհում չի նախատեսում ՀՀ ֆիզիկական գոյությունն այն տեսքով, ինչպիսին այն այժմ կա։ Այս մասին «Եվրասիա-Հայաստան» փորձագիտական հարթակում «Նոր աշխարհակարգը և Հայաստանի աշխարհաքաղաքական ընտրությունը» թեմայով քննարկման ժամանակ ասել է քաղաքական վերլուծաբան Արման Աբովյանը։

«Կարծում եմ՝ մենք ունենք ոչ թե պատրանքներ, այլ գուցե իրականության իներցիոն ընկալում այն առումով, որ հիմա ձևավորվում են ինչ-որ աշխարհաքաղաքական նոր ձևաչափեր ու հիմա պարզապես պետք է դրանք վերապրել… Հարցն այն է, թե որքանո՞վ ենք պատրաստ մասնակցել որոշակի պայմանների ձևավորմանը, որպեսզի շարունակենք ապրել և գոյություն ունենալ ոչ միայն մեր քաղաքական համակարգի, այլև հայության փիլիսոփայության շրջանակներում»,- նշել է նա։

Աբովյանի խոսքով՝ հայերը պետք է որոշակի տեսլական ձևավորեն այն մասին, թե ուր են գնում։ «Հայաստանը փորձում են ինտեգրել թյուրքական աշխարհին։ Հայաստանի ցանկացած ինտեգրում այսպես կոչված թյուրքական աշխարհին ենթադրում է, որ ՀՀ-ն չի կարող գոյություն ունենալ իր ներկայիս տեսքով, և հայ ժողովուրդը չի կարող պահպանել իր ֆիզիկական ու հոգևոր գոյությունը»,- նշել է փորձագետը։