ԵՄ-ն Կովկասում ակտիվանում է․ ի՞նչ կտա երևանյան գագաթնաժողովը. Բադալյան
04 Մայիսի 2026, 13:30
Երևանում անցկացվող Եվրոպական քաղաքական համայնքի գագաթնաժողովի շրջանակում Զելենսկու այցն, ըստ քաղաքական մեկնաբան Հակոբ Բադալյանի, մեծ ինտրիգ չի ներկայացնում և դժվար թե լուրջ հետևանքներ ունենա, եթե Հայաստանի հետ կոնկրետ բովանդակություն չլինի։
Alpha News-ի հետ զրույցում Բադալյանը նշել է, որ այցն, ըստ էության, կրում է ֆորմալ բնույթ։
«Այդ այցը կապված է Եվրոպական քաղաքական համայնքի գագաթնաժողովի հետ, և աշխատանքային կամ պաշտոնական հանդիպումների մասին տեղեկություն առայժմ չի հրապարակվել»,- ասել է նա։
Անդրադառնալով Եվրոպական միության և Հայաստանի հարաբերություններին՝ Հակոբ Բադալյանը մեկնաբանել է նաև ԵՄ բարձրաստիճան ներկայացուցիչ Կայա Կալասի հայտարարությունը, ըստ որի՝ Հայաստանը պետք է ինքնուրույն որոշի իր արտաքին քաղաքական ուղղությունը։ Նրա խոսքով՝ սա, ըստ էության, պատասխան է Նիկոլ Փաշինյանի այն ձևակերպմանը, թե Հայաստանը կմերձենա Եվրամիությանն այնքան, որքան պատրաստ կլինի ԵՄ-ն։
«Եվրամիությունն այդ պատասխանատվությունը վերադարձնում է Նիկոլ Փաշինյանին, քանի որ տեսնում է՝ Փաշինյանը պատասխանատվությունը տեղափոխում է ԵՄ դաշտ»,- նշել է նա։
Քաղաքական մեկնաբանի կարծիքով՝ իրականում ԵՄ-ի կողմից Հայաստանի անդամակցության մտադրություն չկա։
«Եվրամիությունը բացարձակապես մտադրություն չունի Հայաստանին անդամ դարձնել, և ընդհանրապես կովկասյան ուղղությամբ անդամակցության թեման չի դիտարկվել և չի դիտարկվում որպես լուրջ օրակարգ»,- ընդգծել է Բադալյանը՝ հավելելով, որ Հայաստանի իշխանությունները ևս տեղյակ են այդ մասին։
Հիմա եթերում
