Այվազովսկու «Իններորդ ալիք» կտավն առաջին անգամ համալիր կվերականգնվի

Աշխարհահռչակ հայ ծովանկարիչ Հովհաննես Այվազովսկու հանրահայտ «Իններորդ ալիք» կտավը, որը պահվում է Սանկտ Պետերբուրգի Ռուսական թանգարանում, առաջին անգամ կուղարկվի համալիր վերականգնման։

176 տարվա ընթացքում «Իններորդ ալիքը» երբևէ ամբողջությամբ չի վերականգնվել․ կատարվել են միայն հատվածական ամրացման աշխատանքներ։ Այդ պատճառով շարունակել է վատթարանալ գունաշերտի և հիմքի վիճակը։

Կտավի վերականգնումը որոշվել է իրականացնել Այվազովսկու մեծ ցուցահանդեսից առաջ, որը կբացվի Սանկտ Պետերբուրգի Ռուսական թանգարանի Բենուա մասնաշենքում 2026 թվականի հոկտեմբերին։ Վերականգնողական աշխատանքները կտևեն չորս ամիս։

«Իններորդ ալիք»-ը նկարչի ամենահայտնի գործերից է, որը ստեղծվել է 1850 թվականին։ Նկարը կենտրոնական տեղ է զբաղեցնում Ռուսական թանգարանի մշտական ցուցադրությունում։ Այս մոնումենտալ կտավը փառաբանում է մարդկային ոգու ուժը՝ կործանարար տարերքի դեմ պայքարում։