«Կայսրությունը հակահարված է հասցնում». ինչպես հայ պրոդյուսերը նվաճեց Հոլիվուդը

Հովարդ Ղազանջյանը ծնվել է 1942 թվականի հուլիսի 26-ին Լոս Անջելեսում՝ հայ գաղթականների ընտանիքում։ Հայրը Տիգրանակերտից էր (այժմ՝ Դիարբեքիր, Թուրքիա), իսկ մայրը՝ Փասադենայից։ Վաղ տարիքից նա շրջապատված է եղել հայկական սփյուռքի մշակույթով ու արժեքներով, ինչն էլ ձևավորել է նրա աշխարհայացքը։ 

Հարավային Կալիֆոռնիայի համալսարանում ուսանելու տարիներին Ղազանջյանը ծանոթացել է Ջորջ Լուկասի հետ՝ դառնալով նրա մտերիմ ընկերն ու գործընկերը։ Նրանք միասին անդամակցում էին «Delta Kappa Alpha» ուսանողական եղբայրությանը և ընդգրկված էին երիտասարդ ռեժիսորների այն խմբում, որը հայտնի էր «Կեղտոտ տասներկուսը» անունով։

Կարիերան սկսելով որպես ռեժիսորի օգնական՝ Ղազանջյանն աշխատել է Ալֆրեդ Հիչքոքի («Family Plot»)և Սեմ Փեքինփայի («The Wild Bunch») հետ։ Սակայն շուտով նա հասկացել է, որ իր բուն կոչումը պրոդյուսերությունն է։

1977-1984 թվականներին նա զբաղեցրել է «Lucasfilm» ընկերության արտադրության գծով փոխնախագահի պաշտոնը՝ ղեկավարելով նկարահանումների կազմակերպումն ու նախագծերի ռազմավարական ընթացքը։ Ի դեպ, հենց Ղազանջյանն էր առաջարկել «Return of the Jedi» ֆիլմի նկարահանումներն իրականացնել «Blue Harvest» կեղծ անվան տակ, որպեսզի ծառայություններ մատուցող ընկերությունները, օգտվելով ֆիլմի հայտնիությունից, գներն անհիմն չբարձրացնեն։

Ղազանջյանը եղել է «Raiders of the Lost Ark» ֆիլմի գործադիր պրոդյուսերը և «Return of the Jedi» ֆիլմի պրոդյուսերը, ինչպես նաև մասնակցել է «The Empire Strikes Back» ֆիլմի ստեղծմանը։ Նրա մեծ ներդրումն ապահովել է այս ֆիլմերի հսկայական հաջողությունը՝ դրանք դարձնելով համաշխարհային կինոյի դասական նմուշներ։

Ավելի ուշ նա աշխատել է «Demolition Man» և մի շարք այլ նախագծերի վրա, ինչպես նաև գրքեր է հեղինակել Ամերիկյան Արևմուտքի պատմության մասին։ 2021 թվականին լույս է տեսել նրա հուշագրությունը՝ «Howard Kazanjian: A Producer’s Life»։

Կինոարտադրությունից զատ, Ղազանջյանն ակտիվորեն ներգրավված է ԱՄՆ-ի հայկական մշակութային և բարեգործական ծրագրերում։ Նա ամուսնացած է Քերոլ Էնն Էսկիջյանի հետ, ունի երեք երեխա և ապրում է Կալիֆոռնիայի Սան Մարինո քաղաքում։

Նրա ավելի քան կեսդարյա կարիերան լավագույնս արտացոլում է Հոլիվուդի զարգացման ուղին՝ իրական էֆեկտների դարաշրջանից մինչև թվային հեղափոխություն։ Ղազանջյանը մնում է պրոֆեսիոնալիզմի և կինոարվեստին անմնացորդ նվիրվածության օրինակ, իսկ նրա հայկական ծագումն առանձնահատուկ արժեք է հաղորդում նրա հարուստ կենսագրությանը։