ԵԱՏՄ երկրները ստորագրել են գիտական կոչումների փոխադարձ ճանաչման համաձայնագիր

Եվրասիական տնտեսական միության (ԵԱՏՄ) անդամ երկրների քաղաքացիները նոր միջազգային համաձայնագրի ուժի մեջ մտնելուց հետո կկարողանան աշխատանքի անցնել ԵԱՏՄ այլ պետություններում՝ առանց գիտական կոչումների նոստրիֆիկացման ընթացակարգի։ Այս մասին հայտնել է Եվրասիական տնտեսական հանձնաժողովի (ԵՏՀ) մամուլի ծառայությունը։

Գիտական կոչումների մասին փաստաթղթերի փոխադարձ ճանաչման համաձայնագիրը ԵԱՏՄ անդամ պետությունների կառավարությունների ղեկավարները ստորագրել են Ղրղզստանի Չոլպոն-Աթա քաղաքում։ Փաստաթղթի նպատակն է բարձրացնել բարձր որակավորում ունեցող գիտական կադրերի շարժունակությունը և ընդլայնել նրանց մասնագիտական գործունեության հնարավորությունները Միության միասնական աշխատաշուկայում։

ԵՏՀ-ի տնտեսության և ֆինանսական քաղաքականության նախարար Բախիթ Սուլթանովի խոսքով՝ համաձայնագիրը ռազմավարական նշանակություն ունի ԵԱՏՄ միասնական աշխատաշուկայի զարգացման համար։

«Գիտական կոչումների ուղղակի ճանաչումը վերացնում է վարչական խոչընդոտները և բարձր որակավորում ունեցող գիտական կադրերի համար լայն հնարավորություններ է ստեղծում մասնագիտական գործունեություն ծավալելու ԵԱՏՄ ցանկացած անդամ պետությունում։ Դա ուղղակիորեն նպաստում է գիտաարտադրական համագործակցության ամրապնդմանը, մեր տնտեսությունների մրցունակության բարձրացմանը և Միության միասնական գիտական տարածքի ձևավորմանը», — նշել է նա։