Պատրիկ Դևեջյան. ո՞վ է Թուրքիայի համար գլխացավանք դարձած հայը

Alpha News-ը շարունակում է ներկայացնել «Ալֆա պերսոնա» շարքը:

70-ականների վերջին ֆրանսիացի հայտնի քաղաքական գործիչ Պատրիկ Դևեջյանը առաջադրել է իր թեկնածությունը Անտոնի քաղաքի քաղաքապետի պաշտոնում։ Հենց նրա թեկնածությունն էլ այս պաշտոնում հաստատվել է 1978 թվականին։ Դևեջյանը վերընտրվել է նաև 1983, 1989, 1995 և 2001 թվականներին՝ հաղթելով Կոմկուսի մրցակիցներին։ Պատրիկը պատգամավոր է դարձել Օ-Դը-Սեն դեպարտամենտից՝ վերընտրվելով 1988, 1993, 1997 և 2002 թվականներին։

2000-ականների սկզբին քաղաքական գործիչը մտել է կառավարության կազմի մեջ, իսկ երկու տարի անց Դևեջյանը դարձել է արդյունաբերության նախարար՝ միաժամանակ շարունակելով բարձր պաշտոն զբաղեցնել:

2007 թվականի մայիսին Դևեջյանն ընտրվել է Ֆրանսիայում իշխող «Միություն հանուն ժողովրդական շարժման» կուսակցության գլխավոր քարտուղար։ Վերջին երկու տարիներին նա նաև Ֆրանսիայի նախագահ Նիկոլա Սարկոզիի քաղաքական հարցերով խորհրդականն էր։

Չի կարելի չնշել, որ Պատրիկն իր ողջ քաղաքական գործունեության ընթացքում սերտորեն կապված է եղել հայ համայնքի հետ, ակտիվ մարտիկ է եղել հայկական սփյուռքի ներկայացուցիչների իրավունքների և Հայոց ցեղասպանության ճանաչման համար: Դրա համար նրան նույնիսկ «գլխացավանք էին անվանում Թուրքիայի համար»։