Դուք եք սկսել ծեծկռտուքը․ Ռուբինյանը՝ ընդդիմադիր պատգամավորին

Ես ընդմիջման ընթացքում նայել եմ բոլոր կադրերը, նորից դիտել եմ պարոն Տարոն Չախոյանի ելույթը, նայել եմ ձեր պահվածքի կադրերը՝ և՛ ծեծկռտուքը, և՛ միջանցքում տեղի ունեցածը, և պետք է արձանագրեմ հետևյալը։ Այս մասին ԱԺ նիստում ասել է Ազգային Ժողովի նախագահ Ռուբեն Ռուբինյանը՝ անդրադառնալով ԱԺ-ում իշխանական և ընդդիմադիր պատգամավորների միջև տեղի ունեցած ծեծկռտուքին։

«Տարոն Չախոյանն իր ելույթում չի օգտագործել գեթ մեկ վիրավորական բառ։ Ոչ մի բառ, որը կարող է վիրավորական լինել կամ ընկալվել որպես վիրավորական։ Լրիվ նորմալ ելույթ էր ունենում»,- ասել է նա:

Նրա խոսքով՝ Նարեկ Կարապետյանը չի կարողացել զսպել էմոցիաները, տեղից վիրավորական արտահայտություններ է արել, ապա մոտեցել է Չախոյանին՝ փորձելով հարվածել նրան։

«Պարոն Կարապետյան, այս տեղի ունեցածի անմիջական պատասխանատուն դուք եք։ Դուք եք սկսել այս ամեն ինչը, դուք եք միջամտել պատգամավորի ելույթին, դուք եք սկսել ծեծկռտուքը»,- ասել է Ռուբինյանը։