Բոլորը գալիս են, միայն տիկինն է զբաղված. Խամոյանը՝ գլխավոր դատախազի մասին

Քրեական գործով իրեղեն ապացույցները ՀՀ գլխավոր դատախազը Քննչական կոմիտեի նախագահի հետ միասին գրկած տարել են պատկերասրահ ու սկսել հիանալ այդ իրեղեն ապացույցներով, բայց գլխավոր դատախազն Ազգային ժողով չի գալիս և զեկույցով հանդես չի գալիս։ Այս մասին ԱԺ-ում ասել է «Հայաստան» խմբակցության պատգամավոր Ագնեսա Խամոյանը։

Պատգամավորը նշել է, որ բյուջետային քննարկումներին մասնակցում են տարբեր պետական կառույցների ղեկավարները, իսկ գլխավոր դատախազը՝ ոչ։

«Դուք կասեք՝ օրենքն է այդպիսին, բայց դա նաև իր ցանկության հարցն է։ Օրինակ՝ պարոն Պողոսյան, դուք ինչո՞ւ եք եկել. մի օրենք էլ ձեզ համար հանեք, դուք էլ մի՛ եկեք։ Ասենք՝ Ազգային անվտանգության ծառայության տնօրենն ինչո՞ւ է գալիս։

Չէ՛, ես անկեղծ հարց եմ ուզում տալ և ուզում եմ, որ իշխանական պատգամավորներն էլ այս հարցին պատասխանեն։ Պաշտպանության նախարարը պարապ է, ժողովուրդ, ինչո՞ւ է գալիս, վաղն ինչո՞ւ է գալու Արտաքին հետախուզական ծառայության պետը։ Բոլորը գալիս են կառույցի ղեկավարի մակարդակով, և միայն տիկինն է, որ զբաղված է»,- նշել է պատգամավորը։