Հայտնի է՝ ովքեր կլինեն Ազգային կոմիտեի կազմում

Վազգեն Մանուկյանը Հանրապետության հրապարակում մեկնարկած հանրահավաքի մեկնարկին հայտնեց համաժողովրդական շարժումը համակարգելու համար ձեւավորվող Ազգային կոմիտեի կազմը։

Այն բաղկացած կլինի 11 գործչից, այս պահին հրապարակվեց 5 անուն ` Հայկ Մամիջանյան, Ավետիք Չալաբյան, Անդրանիկ Թևանյան, Իշխան Սաղաթելյան, Վազգեն Մանուկյան։

Մանուկյանը կոչ արեց վաղը առավոտյան ժամը 10-ին հավաքվել կառավարության շենքի մոտ ու թույլ չտալ, որ անցկացվի կառավարության հերթական նիստը։ Բացի այդ, նա կոչ արեց պարալիզացնել քաղաքը, փակել փողոցներ։

Իսկ Անդրանիկ Թևանյանը հայտարարեց, որ վաղը առավոտյան 7։30-ից սկսվում են անհնազանդության գործողությունները: Նա կոչ արեց ճանապարհը փակ պահել բոլոր մեքենաների համար, թույլ տալ անցնել միայն Շտապ օգնության մեքենաներին։