Կայացավ ԱՄՆ-ում հրատարակված «Շենգավիթ» կոլեկտիվ մենագրության շնորհանդեսը
24 Մայիսի 2023, 17:32
ԵՊՀ գիտական խորհրդի նիստերի դահլիճում կայացավ ԱՄՆ-ում հրատարկված Շենգավիթ քաղաքատեղիի գրեթե բոլոր առանձնահատկությունները ներկայացնող «Շենգավիթ» մենագրության շնորհանդեսը:
«Արմենպրես»-ի հետ զրույցում մենագրության գիտական խմբագիր, պատմական գիտությունների թեկնածու, արվեստագիտության դոկտոր, պրոֆեսոր, Ռուսաստանի բնական գիտությունների ակադեմիայի արտասահմանյան ակադեմիկոս Հակոբ Սիմոնյանը նշեց՝ աշխատությունը բացահայտում է Հայաստանի հնագույն մշակույթների համար կարևորագույն շրջափուլերից մեկի՝ վաղ բրոնզի դարի շենգավթյան կամ քուր-արաքսյան կոչվող մշակույթի առանցքային հուշարձաններից մեկի՝ Շենգավիթ քաղաքատեղիի գրեթե բոլոր առանձնահատկությունները:
«Գրքի գլուխները գրել են ինչպես գիտական խմբագիրները, այնպես էլ Հայաստանում և արտերկրում մեծ հեղինակություն վայելող մեկ տասնյակից ավելի գիտնականներ:
Հրատարակված մենագրությունը նոր խոսք է հայագիտության բնագավառում և կարևոր նշանակություն ունի Հայաստանի հնագույն պատմության ու մշակույթի բացահայտման և միջազգային մակարդակով այն ներկայացնելու առումով,- նշեց Սիմոնյանը:
Նրա խոսքով՝ գիտական կարևորությունից զատ, գիրքն ունի Հայաստանը ներկայացնելու առաքինություն և ներկայացվել է աշխարհի գրեթե բոլոր հեղինականավոր գրադարաններում:
Հեղինակը նշեց, որ մենագրության գիտական խմբագիրն է նաև ԱՄՆ Վայդների համալսարանի պատվավոր պրոֆեսոր Միտչել Ռոթմանը:
Գրքի վրա աշխատելու 20 տարիներին կատարվել են տարբեր պեղումներ, հայտնաբերված գտածոների վերականգնում, գրչանկարների պատրաստում, դասակարգում, բնութագրում:
Գիրքը հայերեն հրատարակելու նպատակ ունեն, որի պատասխանատուն ԵՊՀ հրատարակչությունն է լինելու:
ԵՊՀ հրատարակչության տնօրեն Կարեն Գրիգորյանը նշեց, որ ԵՊՀ-ն այն կառույցն է, որը միշտ կարևորել է նման աշխատանքները:
Նրա խոսքով՝ գրքի հայերեն տարբերակի թարգմանությունը կսկսեն ամռանը, իսկ տպագրական աշխատանքները՝ այս տարվա ավարտին:
«Հասկանում ենք, որ այս աշխատանքը կարևոր է նաև մեր ներքին լսարանի համար: Վստահ ենք, որ այն կհետաքրքրի ոչ միայն մասնագետներին, այլև ավելի լայն շրջանակներին»,- եզրափակեց Գրիգորյանը:
Հիմա եթերում
