Ալիևի սպառնալիքներն արվում են ընտրություններից առաջ ազգի փրկչի իմիջ ստեղծելու համար. Անդրեյ Չուպրիգին

Ազգային հետազոտական համալսարանի Տնտեսագիտության բարձրագույն դպրոցի, համաշխարային տնտեսության ու քաղաքականության ավագ դասախոս, Միջազգային գործերով ռուսական խորհրդի փորձագետ Անդրեյ Չուպրիգինը Alpha News-ին մեկնաբանել է Ադրբեջանի նախագահ Իլհամ Ալիևի սպառնալիքները Հայաստանի հասցեին։

Ըստ փորձագետի՝ Իլհամ Ալիևը նման հայտարարություններ է անում արտահերթ ընտրություններից առաջ՝ հայրենիքի պաշտպանի իմիջ ձևավորելու համար։

«Ալիևի սպառնալիքները բացատրվում են նրանով, որ շուտով ընտրություններ են, և նա պետք է ձևավորի հասարակական կարծիքի իր իմիջը, իսկ հայրենիքի պաշտպանի հարցը այժմ նրա օրակարգում է, ուստի նա առաջ է քաշում այս թեման։ Ինչ վերաբերում է նոր հակամարտության սրմանը, ապա դա հնարավոր է ցանկացած իրավիճակում, քանի որ Հայաստանի և Ադրբեջանի միջև համաձայնություն չկա, և դա ինքնին նշանակում է լոկալ գործողություններ սկսելու իրական հնարավորություն, որոնք հետագայում կարող են հանգեցնել էսկալացիայի։ Բայց կարելի է հուսալ, որ դա տեղի չի ունենա, քանի որ մեծ հաշվով Ալիևը կատարել է այն խնդիրները, որոնք այսօր դրել էր իր առջև և, բնականաբար, չէր դժգոհի»,- ասել է փորձագետը։

Նա միաժամանակ նշել է․

«Ընտրության գնացող մարդը նյարդային վիճակում է, ինչքան էլ ավտորիտար լինի և այլն, որովհետև կարող է ստացվել, որ նա չընտրվի։ Ուստի հիմա, ամեն դեպքում, ընտրություններից առաջ նա պետք է բնակչության ուղղությամբ ինչ-որ գործողություններ անի։ Եվ սա նման է Ալիևի՝ որպես ազգի փրկչի իմիջի պահպանմանը, որը թքած ունի ադրբեջանական ժողովրդի բոլոր շահերի վրա՝ առանց բացառության»,- եզրափակել է Չուպրիգինը։