Արթուր Աբրահամ․ Իր հայրենիքին սիրահարված չեմպիոնը

Alpha News-ը շարունակում է ներկայացնել «Ալֆա պերսոնա» շարքը:

Այսօր անվանի բռնցքամարտիկ, աշխարհի չեմպիոն Արթուր Աբրահամի ծննդյան 44-ամյակն է:

Արթուր Աբրահամի իսկական անունը Ավետիք Աբրահամյան է, ծնվել է արևոտ Երևանում: Սակայն նա ընտանիքի հետ հեռացել է Հայաստանից և տեղափոխվել հին գերմանական Բամբերգ քաղաք, որտեղ շարունակել է բռնցքամարտով զբաղվել։

Հարկ է նշել, որ մի քանի տարի շարունակ նա Հայաստան էր գալիս մարզվելու և զարգացնում էր իր մարզական ոգին։

Արթուր Աբրահամը նաև ծառայել է հայկական բանակում և բարձրագույն իրավաբանական կրթություն ստացել հայրենիքում։

Արթուր Աբրահամի նորամուտը պրոֆեսիոնալ ռինգում կայացել է 2003 թվականին՝ գերմանացի Ֆրանկ Կարի Ռոթի դեմ մենամարտում: Կարելի է ասել, որ Արթուրի համար պրոֆեսիոնալ կարիերայի սկիզբը հաջող էր։ Նա տեխնիկական նոկաուտով հաղթանակ է տարել երրորդ ռաունդում:

Այնուհետև Աբրահամն անցկացրել է 12 անընդմեջ մենամարտ, որոնք հաղթել է նոկաուտով և դուրս եկել առաջին տիտղոսային մենամարտում WBA վարկածով աշխարհի միջմայրցամաքային չեմպիոնի կոչման համար:

12-րդ ռաունդում ավստրալացի Նադեր Համդանի հետ մենամարտում նա հաղթել է նոկաուտով: Հետագայում միջմայրցամաքային չեմպիոնի տիտղոսն Արթուրը հաջողությամբ պաշտպանել է երեք անգամ։

Պրոֆեսիոնալ կարիերան Աբրահամը համատեղում է գերմանական ARD հեռուստաալիքում մեկնաբանի աշխատանքի հետ։ Ուղիղ եթերում նա մեկնաբանել է ծանր քաշային կարգում WBA վարկածով չեմպիոն Նիկոլայ Վալուևի մենամարտը ամերիկացի Մոնտի Բարեթի հետ։

Չնայած Արթուրի ողջ գիտակցական կյանքն անցել է հայրենիքից հեռու, նա չի դադարում սիրել Հայաստանը և հաճախ է գալիս հայրենի երկիր՝ բազմիցս կրկնելով, թե որքան է սիրում այն և ցանկանում է, որ այն բարգավաճի: