Գուրգեն Գաբրիելյան. Հայրենիքն անկեղծ սիրող բանաստեղծը

Alpha News-ը շարունակում է ներկայացնել «Ալֆա պերսոնա» շարքը:

Գուրգեն Գաբրիելյանը ծնվել է 1927թ. հունիսի 11-ին Լեռնային Ղարաբաղի Ասկերանի շրջանի Խանցք գյուղում:

Բանաստեղծն ավարտել է Ստեփանակերտի մանկավարժական ինստիտուտը։ Գուրգեն Արտեմովիչը ժամանակին աշխատել է ռադիոհեռարձակման մարզային կոմիտեում, «Սովետական Ղարաբաղ» թերթում, ղեկավարել ԼՂԻՄ մշակույթի մարզային վարչությունը։ Աշխատել է նաև Ստեփանակերտի պետական թատրոնի տնօրենի պաշտոնում: Ավելի ուշ դարձել է Լեռնային Ղարաբաղի մայրաքաղաքում Թումանյանի անվան մանկական գրադարանի տնօրեն։

Գուրգեն Գաբրիելյանը մի քանի տասնյակ բանաստեղծական ժողովածուների հեղինակ է: Արցախում և Հայաստանում, ինչպես նաև հայկական Սփյուռքում սիրված են Գաբրիելյանի «Ղարաբաղի հորովել», «Գանձասար» և շատ այլ երգեր:

Գուրգեն Գաբրիելյանը Արցախյան ազատագրական շարժման առաջնորդներից էր, հրաշալի մանկավարժ, Արցախյան բանահյուսության հավաքող և շատ շնորհալի մարդ՝ տարբեր նախասիրություններով: Իր անկրկնելի տաղանդի շնորհիվ Գուրգեն Գաբրիելյանը փոխեց մոտեցումը հայ մանկական գրականության նկատմամբ, բանաստեղծը շատ լավ գիտեր մանկական հոգին և սիրով շփվում էր երեխաների հետ նրանց լեզվով: Գաբրիելյանն ուներ աննկարագրելի և նվիրված սեր Հայրենիքի, Արցախի հանդեպ և հավատ Ղարաբաղյան շարժման հաղթանակի հանդեպ։