Կառավարությունը ՀԷՑ-ի բաժնետոմսերը հանրային գերակա շահ ճանաչեց․ դրանք կօտարվեն հօգուտ պետության

Կառավարությունն այսօրվա նիստում հանրային գերակա շահ ճանաչեց «Հայաստանի էլեկտրական ցանցեր» ընկերության 100 տոկոս բաժնետոմսերը՝ պետությանն օտարելու նպատակով։

Անդրադառնալով որոշմանը՝ վարչապետ Նիկոլ Փաշինյանը հայտարարել է, որ քաղաքական առումով ՀԷՑ-ի հարցը ապօրինի գույքի վերադարձի գործընթացի անբաժանելի մասն է։

«Ժողովրդից տարվածը վերադարձվում է ժողովրդին»,– ասել է Փաշինյանը։

Որոշման հիմնավորման մեջ նշվում է, որ հանրային գերակա շահի սկզբունքը պետությանը միջամտելու հնարավորություն է տալիս այն դեպքերում, երբ վտանգվում է քաղաքացիների՝ անխափան և անվտանգ ծառայություններ ստանալու իրավունքը։

Կառավարության հիմնավորման համաձայն՝ էլեկտրաէներգիայի բաշխիչ ցանցերը ռազմավարական ենթակառուցվածք են, որոնց աշխատանքի խափանումը կարող է հանգեցնել սոցիալական, տնտեսական և անվտանգային լուրջ հետևանքների։ Այդ պատճառով պետությունն, ըստ որոշման հեղինակների, ոչ միայն իրավունք ունի, այլև պարտավոր է միջամտել, երբ անհրաժեշտ է ապահովել պետության և հասարակության անվտանգությունը։

Նախագծով ՀԷՑ-ի բաժնետոմսերի օտարման գործընթացի ավարտի վերջնաժամկետ է սահմանվել 2027 թվականի հոկտեմբերի 1-ը։

Օտարման ենթակա են ընկերության 246 հազար 423 բաժնետոմսերը, որոնց ընդհանուր անվանական արժեքը կազմում է 20 միլիարդ 674 միլիոն 889 հազար 700 դրամ։ Դրանցից 172 հազար 496-ը՝ մոտ 70 տոկոսը, պատկանում է «Տաշիր Կապիտալ» փակ բաժնետիրական ընկերությանը, իսկ 73 հազար 927-ը՝ մոտ 30 տոկոսը, «Լիորմանդ Հոլդինգզ Լիմիթեդին»։