Ռուսաստանի օրվան նվիրված միջոցառմանը Պուտինը պետական մրցանակ է հանձնել Ալեքսանդր Չուբարյանին

Ռուսաստանի նախագահ Վլադիմիր Պուտինը Գեորգիևյան սրահում պարգևատրել է Ռուսաստանի Դաշնության գիտության և տեխնիկայի բնագավառներում պետական մրցանակների դափնեկիրներին։

2024 թ. հումանիտար գործունեության մեջ ակնառու նվաճումների համար ՌԴ պետական մրցանակ է շնորհվել ՌԴ կրթության և գիտության նախարարությանը կից Հանրային խորհրդի նախագահ, ՌԴ ԳԱ համընդհանուր պատմության ինստիտուտի գիտական ղեկավար Ալեքսանդր Օհանի Չուբարյանին:

Հիշեցնենք, որ 2021 թվականին ականավոր գիտնականն արժանացել է պետական բարձր պարգևի՝ «Հայրենիքին մատուցած ծառայությունների համար» 1-ին աստիճանի շքանշանի։

Ալեքսանդր Չուբարյանը միջազգային հարաբերությունների պատմության և 20-րդ դարի ռուս-եվրոպական հարաբերությունների մասնագետ է, ավելի քան 350 գիտական աշխատությունների հեղինակ, ռուսական պատմագրության մեջ եվրոպական գաղափարների ուսումնասիրման ուղղության հիմնադիրներից մեկը։