«Խաղաղության բանակցությունների ավարտի համար երկու կողմի ցանկությունն է հարկավոր». Ադրբեջանում ՌԴ դեսպան
12 Փետրվարի 2024, 11:31
Այժմ Հայաստանն ու Ադրբեջանն ուղղակիորեն փոխանակում են խաղաղության պայմանագրի նախագծերը: Այս մասին «Իզվեստիա» պարբերականին տված հարցազրույցին ասել է Ադրբեջանում ՌԴ դեսպան Միխայիլ Եվդոկիմովը։ Նա անդրադարձել է հայ-ադրբեջանական խաղաղության բանակցություններին, պաշտոնական Մոսկվայի դիրքորոշմանն ու Հայաստանի դիրքավորմանը, ապաշրջափակման հարցերին։
«Այն, ինչ առաջարկում է ադրբեջանական կողմը, իմ կարծիքով, միանգամայն արդարացված, ստանդարտ ձևակերպումներ և հոդվածներ են, որոնք, որպես կանոն, գոյություն ունեն կողմերի միջև խաղաղության պայմանագրերում: Եվ, սկզբունքորեն, այն առաջարկների հիման վրա, որոնք անում է Բաքուն, ինձ թվում է, կարելի է արագ ավարտել այդ բանակցությունները։ Մենք պատրաստ ենք տրամադրել մոսկովյան հարթակը, պատրաստ ենք անհրաժեշտության դեպքում տրամադրել մեր փորձաքննությունը, տեքստի վերաբերյալ մեր խորհուրդները։ Այստեղ մենք ադրբեջանցի գործընկերների հետ շատ լավ փոխգործակցություն ունենք։ Ես տեսնում եմ, որ Ադրբեջանը տրամադրված է շատ արագ ավարտին հասցնել խաղաղության պայմանագրի ստորագրման բանակցությունները։ Սակայն, ինչպես հայտնի է, բանակցություններն ավարտելու համար նման ցանկություն պետք է ունենա երկու կողմը»։
Դեսպանը նաև նշել է, որ հայկական կողմը ձգձգում է Ադրբեջան-Նախիջևան կապի բանակցությունները։
«Այս թեման ադրբեջանական կողմի համար շատ կարևոր է։ Դա կայուն տրանսպորտային երթուղու, Ադրբեջանի հիմնական տարածքի և Նախիջևանի միջև տրանսպորտային ուղիների առկայությունն է։ Ղարաբաղյան առաջին պատերազմի ժամանակ ընդհատվել են բոլոր հաղորդակցությունները, անջատվել է էլեկտրաԷներգիայի մատակարարումը Նախիջևան։ Ուստի Ադրբեջանի համար երթուղու անվտանգությունը (մոտավորապես 46 կմ) վերացական թեմա չէ։ Այս երթուղու վրա կան նաև թունելներ, այնտեղ, իմ կարծիքով, կա նաև կամուրջ։ Ռուսաստանը պատրաստ էր բավականին արագ վերականգնել այս երթուղին իր հաշվին։ Ինձ համար ոչ այնքան հասկանալի պատճառներով հայկական կողմը ձգձգում է բանակցությունները», — նշել է Եվդոկիմովը։
Հիմա եթերում
