Ազիզ Ասկարյան․ Կոչումով կրկեսային արտիստ

Alpha News-ը շարունակում է ներկայացնել «Ալֆա պերսոնա» շարքը:

Ազիզ Ասկարյանը Ռուսաստանի ժողովրդական արտիստ է, «ЦИРКЪ» ազգային մրցանակի դափնեկիր, «Կապիկների շոու»-ի ղեկավար, Ցվետնոյ բուլվարի կրկեսի արտիստ։

Ազիզ Ասկարյանը համաշխարհային մեծության արտիստ է։ Նրա վարժեցրած կապիկները կատարում են անհավանական հնարքներ, որոնց հավասարը ոչ մի տեղ չի կարելի գտնել․ պարում են կանկան և կուկարաչա, բրեյք-դանս և տանգո, լեզգինկա և գնչուական պարեր, հեծանիվներ են քշում և խաղում են այլ տեսակի խաղեր:

Ընդ որում, ամենահետաքրքիրն այն է, որ Ասկարյանը տարիներ շարունակ հանդես չի գալիս նույն ծրագրով, այլ անընդհատ հանդես է գալիս նոր գաղափարներով:

Արտիստի կենդանիները բազմիցս մասնակցել են երաժշտական տեսահոլովակների, գովազդային հոլովակների, գեղարվեստական ֆիլմերի, հեռուստահաղորդումների և էստրադային համերգների նկարահանումների:

Ազիզ Ասկարյանն ավարտել է Թբիլիսիի կրկեսային-էստրադային ուսումնարանը։ Այնուհետև աշխատել է վրացական ֆիլհարմոնիայում։ Արտիստների խմբի հետ շրջել է երկրով մեկ, այդ ուղևորություններից մեկում ծանոթացել է Վախթանգ Կիկաբիձեի հետ։ Ասկարյանի խոսքով՝ դա հետաքրքիր փորձ էր սկսնակ արտիստի կյանքում, բայց նա երազում էր դառնալ կենդանիների վարժեցնող:

Նա նամակ է գրել խորհրդային հայտնի դերասան Յուրի Նիկուլինին, նրան ուղարկել լուսանկարներ իր կենդանիների հետ և, ի զարմանս իրեն, ստացել է պատասխան՝ մայրաքաղաք այցելելու հրավերով: Ասկարյանն անմիջապես վերցրել է տոմսն ու մեկնել Մոսկվա։ Այդ պահից սկսվել է կրկեսի այս ամբողջ պատմությունը։