Յուրի Ջորկաեֆ. Համաշխարհային ֆուտբոլի ամենավառ դեմքերից մեկը

Alpha News-ը շարունակում է ներկայացնել «Ալֆա պերսոնա» շարքը:

Մարտի 9-ը ֆրանսիացի լեգենդար ֆուտբոլիստ Յուրի Ջորկաեֆի ծննդյան օրն է:

Յուրի Ջորկաեֆը ծնվել է 1968 թվականին Լիոնում և դարձել համաշխարհային ֆուտբոլի ամենավառ աստղերից մեկը, 1998 թվականի աշխարհի և 2000 թվականի Եվրոպայի չեմպիոն տիտղոսների տիրակալը:

Յուրիի հայրը նախկինում հայտնի ֆուտբոլիստ Ժան Ջորկաեֆն է, մայրը հայուհի Մարիա Օհանյանն է, ով ֆուտբոլային խաղերից հետո հոր հետ ֆուտբոլիստներին ու երկրպագուներին հյուրասիրում էր արևելյան խոհանոցի ուտեստներով: Յուրիի մոր կողմի հարազատները, այդ թվում Գարո պապը ապրել են Բուրսայում և Հայոց ցեղասպանության սկսվելուց հետո Օսմանյան կայսրությունից փախել են Ֆրանսիա:

Յուրին երիտասարդ տարիքից զբաղվել է աթլետիկայով, ձյուդոյով, լողով և թենիսով, սակայն արդյունքում ընտրել է ֆուտբոլը։ «Գրենոբլ» ակումբում կարիերան սկսելուց հետո նա համապատասխան մարզավիճակ է ձեռք բերել, իսկ 1990 թվականին Արսեն Վենգերի գլխավորությամբ պայմանագիր է կնքել «Մոնակոյի» հետ, որտեղ նրա կարիերան նոր շունչ է ստացել։ Հենց այստեղ նա դարձել է առաջնության ամենավտանգավոր հարձակվողներից մեկը՝ դրսևորելով իր արտասովոր տեխնիկան և ամենագեղեցիկ գոլերը խփելու ունակությունը։

Դրան հաջորդեցին փայլուն ելույթները այնպիսի ակումբներում, ինչպիսիք են «Պարի Սեն Ժերմենը», «Ինտերնացիոնալը», «Կայզերսլաուտերնը», «Բոլթոն Ուոնդերերսը» և «Նյու Յորք Մետրոստարսը», որտեղ Յուրին ոչ միայն պարբերաբար ուրախացնում էր երկրպագուներին իր գոլերով, այլև աչքի էր ընկնում խաղադաշտում խաղալու իր ռազմավարությամբ:

Ֆրանսիայի հավաքականի կազմում նա դարձել է իսկական լեգենդ՝ կարևոր դեր խաղալով 1998 թվականի աշխարհի առաջնության և 2000 թվականի Եվրոպայի առաջնության հաղթանակների մեջ։ Նրա ճշգրիտ հարվածները անսպասելի դիրքերից նրան համաշխարհային ճանաչում բերեցին:

Կարիերան խաղադաշտում ավարտելուց հետո Ջորկաեֆը շարունակել է իր գործունեությունը՝ հիմնադրելով հիմնադրամ, որն ակտիվորեն զարգացնում է ֆուտբոլը Նյու Յորքում: Ոգեշնչելով ապագա սերունդներին՝ նա նաև աշխատում է որպես ֆուտբոլի փորձագետ և FIFA հիմնադրամի գործադիր տնօրեն: Բացի այդ, նա Պատվո լեգեոնի շքանշանի ասպետ է, ինչպես նաև արժանացել է Հայաստանի պատվավոր քաղաքացու կոչումի։

Խոսելով իր արմատների մասին՝ Յուրի Ջորկաեֆը մի անգամ ասել է. «Դա իմ արյան մեջ է։ Ծնողներս ծնվել են Ֆրանսիայում, իսկ տատս ու պապս Հայաստանից են։ Ես մեծացել եմ Լիոնում։ Մենք մեծացել ենք հայկական մթնոլորտում, դաստիարակվել ենք այնպես, ինչպես մյուս հայ երեխաները։ Մենք շատ ուրախ էինք։ Այդ իսկ պատճառով ես ինձ շատ լավ եմ զգում իմ ծագման մասին խոսելիս։ Ես միշտ շատ հպարտ եմ իմ հայկական ծագմամբ և Ֆրանսիայում ծնվելու համար»։