Օվերչուկը Հայաստանի բնակչությանը տեղեկացնում է ԵԱՏՄ-ից դուրս գալու հետևանքների մասին. Կոնստանտին Տասից

Հարավային Կովկասի հարցերով փորձագետ, քաղաքագետ Կոնստանտին Տասիցը Alpha News-ին տված հարցազրույցում անդրադարձել է ՌԴ փոխվարչապետ Ալեքսեյ Օվերչուկի հայտարարությանը Ռուսաստանի և Հայաստանի միջև ապրանքաշրջանառության զգալի նվազման և եվրաինտեգրման ուղեգծի հետևանքների վերաբերյալ։

«Կարծում եմ՝ Օվերչուկն ավելի շուտ Հայաստանի բնակչությանը տեղեկացնում է այն մասին, թե ինչ կլինի, եթե Երևանը զարգացման այնպիսի տարբերակ ընտրի, որով դուրս կգա Եվրասիական տնտեսական միությունից և կմիանա Եվրոպական միությանը։ Հայկական տեղեկատվական դաշտում իշխանությունների կողմից ես չեմ տեսել այս իրավիճակի շրջահայաց վերլուծություն։ Նրանք կարծում են, որ կամ կշարունակեն արտոնություններ ստանալ Ռուսաստանից, կամ Եվրոպան կփոխհատուցի առաջացող որոշ խնդիրներ։

Օվերչուկը կարծես պարզապես նկարագրում է, թե ինչպես իրականում կզարգանա իրավիճակը, քանի որ և՛ Եվրասիական տնտեսական միությունում, և՛ Եվրոպական միությունում կան մաքսային համաձայնագրեր, միասնական մաքսային շուկա։ Համապատասխանաբար, եթե Հայաստանը դուրս գա ԵԱՏՄ-ի կազմից, ապա հայ արտադրողները ստիպված կլինեն վճարել եվրոպական առևտրային տուրք՝ նույնը, ինչ վճարում են եվրոպական այն երկրները, որոնք շարունակում են ինչ-որ բան մատակարարել եվրոպական շուկա։ Նույնը վերաբերում է նաև ավիացիոն հաղորդակցության և տրանսպորտային հաղորդակցությունների հետ կապված բոլոր մյուս ասպեկտներին»,- կարծում է փորձագետը։

Տասիցի կարծիքով՝ Հայաստանի բնակիչները պետք է որոշեն իրենց քաղաքական-տնտեսական նախասիրությունները։

«Հայ ժողովուրդը պետք է ընտրի այն, ինչն ավելի հեռանկարային է համարում ՝ մասնակցությունը Եվրասիական տնտեսական միությանը կամ հրաժարումը այն արտոնություններից, որոնք նա ունի, և վերակողմնորոշումը դեպի եվրոպական շուկա»,- եզրափակել է Կոնստանտին Տասիցը։