Ինչպիսին է ապագան լինելու՝ որոշելու է ինքը՝ հայ ժողովուրդը․ Սամվել Կարապետյան

Ընդամենը մի քանի օրից կավարտվի 2025 թվականը։ Պարզ է, որ 2026 թվականի հունիսին տեղի ունենալիք խորհրդարանական ընտրությունները ճակատագրական հետևանքներ են ունենալու մեր ազգի ապագայի վրա։ Այս մասին ասված է դեկտեմբերի 15-ին ԱԱԾ մեկուսարանից հրապարակված Սամվել Կարապետյանի հոդվածում։

«Ինչպիսին է այդ ապագան լինելու՝ որոշելու է ինքը՝ հայ ժողովուրդը։ Գիտեք, որ փոքրիկ խմբակն ու դրա ղեկավարը առաջարկում են այդ ապագայի իրենց պատկերը։ Չնայած բոլոր արհավիրքներին ու խայտառակ ձախողումներին թող Նիկոլը մնա իշխանության ու ինչու նա պետք է երրորդ ժամկետի մնա՝ պարզ չէ։

Բայց այս ամենն արձանագրելը նորություն չէ։ Կարծում եմ ավելի կարևոր է այլընտրանք առաջարկելը։ Ապրածս կյանքի, բարի համբավի ու արված գործերի հիմքի վրա դրված ապագայի պատկեր առաջարկել։ Մեր ժողովուրդը արդարության կարոտ է մնացել ու մենք պետք է կատարենք մեր ժողովրդի երազանքը։ Հայաստանը պետք է դառնա բարեկեցության, բոլոր իմաստներով ապահով ու լավ ապրող քաղաքացիների երկիր։

Հայաստանը իրավունք չունի վատ հարաբերություն ունենալ որևէ հարևանի ու որևէ գերտերության հետ։ Մենք կրկին պետք է մի մեծ ընտանիք դառնանք, ուր յուրաքանչյուրը իրական սիրո և համերաշխության մթնոլորտում զբաղվում է իր գործով ու շենացնում հայրենի տունը։ Հասկանալի է, որ այսպես թե այնպես՝ ապագան գալու է։ Այլ հարց է, որ մենք՝ հայերս, այն պետք է բառի ամենալավ իմաստով մերը դարձնենք։ Արդար, բարեկեցիկ, հարուստ, խաղաղ ու համերաշխ Հայաստանի Հանրապետության ապագան»,- ասված էր Կարապետյանի ուղերձում:

Հիշեցնենք, որ Սամվել Կարապետյանի նկատմամբ դատարանը կիրառել է համակցված խափանման միջոց գրավ և տնային կալանք։ Բացի այս դատարանը սահմանափակել է Սամվել Կարապետյանի խոսքի ազատությունը և կիրառվել է լրացուցիչ բացառիկ սահմանափակում․ Սամվել Կարապետյանին արգելվել է հանդես գալ որևէ կոչեր պարունակող հայտարարություններով: Այս սահմանափակումը առկա չի եղել նույնիսկ կալանքի պայմաններում: