Մենի Գամբուրյան․ ամերիկյան UFC-ի աստղը
08 Մայիսի 2026, 22:00
Մանվել (Մենի) Գամբուրյանը ծնվել է 1981 թվականի մայիսի 8-ին Գյումրիում։ 1991 թվականին նրա ընտանիքը տեղափոխվել է ԱՄՆ՝ բնակություն հաստատելով Կալիֆոռնիաում։ Դեռ պատանեկության տարիներին նա սկսել է մարզվել «Hayastan MMA Academy»-ում՝ Գոքոր Չիվիչյանի և Ջին Լեբելի ղեկավարությամբ։
Գամբուրյանը պատանեկան տարիներին սկսել է լրջորեն զբաղվել ձյուդոյով․ նա դարձել է ազգային առաջնությունների ութակի չեմպիոն, պատանեկան Օլիմպիադայի հաղթող։ Բացի ձյուդոյից, նա զբաղվել է նաև կյոկուշին կարատեով և բրազիլական ջիու-ջիցուով՝ ստանալով ձյուդոյի և կարատեի սև գոտի։
Պրոֆեսիոնալ կարիերան Մանվել Գամբուրյանը սկսել է 1999 թվականին՝ անընդմեջ տանելով չորս հաղթանակ։ 2001 թվականին նա մենամարտել է ապագա UFC չեմպիոն Շոն Շերկի հետ և պարտվել միավորներով, սակայն հենց այդ ժամանակ էլ ստացել է «Pitbull» մականունն՝ իր ագրեսիվ մարտաոճի համար։
2007 թվականին Գամբուրյանը դարձել է The Ultimate Fighter ռեալիթի շոուի 5-րդ սեզոնի մասնակից։ Նա հասել է եզրափակիչ՝ հաղթելով Ջո Լաուզոնին և Մեթ Ուայմանին, սակայն վճռորոշ մենամարտում ուսի վնասվածք է ստացել և պարտվել Նեյթ Դիասին։ Չնայած պարտությանը՝ նրա ելույթները մեծ տպավորություն են թողել թե՛ հանդիսատեսի, թե՛ UFC ղեկավարության վրա։
2008 թվականին նա տեղափոխվել է WEC կազմակերպություն։ Նրա գլխավոր հաղթանակը նախկին չեմպիոն Մայք Բրաունի նկատմամբ նոկաուտով հաղթանակն էր, ինչը նրան տիտղոսային մենամարտի հնարավորություն տվեց։ 2010 թվականին նա հանդիպել է անպարտելի չեմպիոն Ժոզե Ալդոյին, սակայն պարտվել առաջին ռաունդում։
WEC-ի և UFC-ի միավորումից հետո Գամբուրյանը շարունակել է կարիերան կիսաթեթև, այնուհետև թեթևագույն քաշային կարգերում։ Նրա հաղթանակներից առանձնանում է 2013 թվականին Դրյու Դոբերի նկատմամբ խեղդող հնարքով հաղթանակը։
Մանվել Գամբուրյանը դարձել է ԱՄՆ-ում հայտնի հայ MMA մարտիկներից մեկը։ Նրա ճանապարհը խորհրդանշում է կամքի ուժն ու սպորտին նվիրվածությունը։ Նա շարունակում է մնալ կարևոր դեմք հայկական սփյուռքի համար և օրինակ՝ համաշխարհային ասպարեզում հաջողության ձգտող երիտասարդ մարզիկների համար։
Հիմա եթերում
