Իսրայելը վտանգում է իրանա-ամերիկյան հուշագրի իրականացումը․ Վարդանյան
19 Հունիսի 2026, 18:00
Ի սկզբանե ակնհայտ էր, որ ստորագրված հուշագիրը լինելու է բավականին փխրուն: Այս մասին Alpha News-ի հետ զրույցում ասել է իրանագետ Ժաննա Վարդանյանը։
Նրա խոսքով՝ այս խոչընդոտն ակնհայտ էր դեռևս բանակցային ողջ գործընթացի ընթացքում։
«Այս պայմաններում միանգամայն սպասելի էր, որ Իրանը կփորձի որոշակի ճնշում գործադրել և հասնել Լիբանանում ռազմական գործողությունների դադարեցմանը։ Այժմ մենք տեսնում ենք բանակցությունների հետաձգում՝ հենց այդ պահանջի ֆոնին, սակայն դա դեռ չի նշանակում, որ բանակցություններն ընդհանրապես չեն կայանա»,- նշել է իրանագետը։
Նրա գնահատմամբ՝ հնարավոր է ռազմական գործողությունների որոշակի թուլացում, որի պայմաններում բանակցությունները կրկին շարունակվեն, ինչպես եղել է նախորդ փուլերի ընթացքում։
«Մենք տեսնում ենք Իսրայելի գործողությունների վերաբերյալ հստակ քննադատություն, սակայն այդ քննադատությունը գործնականում դեռ չի հասել իր նպատակին, քանի որ Իսրայելը փաստացի չի դադարեցնում ռազմական գործողությունները»,- եզրափակել է Ժաննա Վարդանյանը։
Հիմա եթերում
