Շատերը Եվրոպայում կյանքը պատկերացնում են տուրիստական գործակալությունների նկարներով. Դմիտրի Սոլոննիկով

Քաղաքագետ Դմիտրի Սոլոննիկովը Alpha News-ին տված մեկնաբանությունում անդրադարձել է Հայաստանի ղեկավարության՝ երկիրը դեպի Արևմուտք տանելու ձգտմանը և այն հանգամանքին, թե ինչով է պայմանավորված հայ հասարակության որոշ հատվածի՝ Եվրոպային միանալու ցանկությունը։

«Ռուսաստանն, անկասկած, Հայաստանի համար եղել է և՛ հսկայական արտահանման շուկա, ինչը չափազանց կարևոր է ներկայիս պայմաններում, և՛ հանրապետության համար անհրաժեշտ մի շարք ռեսուրսների կայուն մատակարար։

Այս երկու գործոններն էլ Եվրամիությունը չի կարող ապահովել այն ծավալով, ինչպես դա անում էր Ռուսաստանը։ Հետևաբար, Եվրամիությունը չի կարող ամբողջությամբ փոխարինել Ռուսաստանին, և ոչ էլ պատրաստվում է դա անել։ Հայաստանը նույնպես հասկանում է, որ նման բան չի լինելու։ Խոսքը Ռուսաստանի փոխարինման մասին չէ, այլ Հայաստանի տնտեսության և հասարակական կյանքի համար բոլորովին նոր մոդելի ձևավորման»,- նշել է փորձագետը։

Քաղաքագետի կարծիքով՝ հայ հասարակության մի մասը Եվրոպայի մասին պատկերացումներ է կազմում գեղեցիկ պատկերների հիման վրա՝ չգիտակցելով, որ այնտեղի իրականությունը բոլորովին այլ է։

«Հայ հասարակության այն հատվածի տեսանկյունից, որը կողմ է այս ուղուն, շատերը չեն հասկանում, թե իրականում ինչ է տեղի ունենում։ Նրանցից շատերի համար սա դրական սցենար է․ «Թող Հայաստանը մնա իր տեղում, ես տարին մեկ անգամ կգամ, կայցելեմ հարազատ վայրերը և կապրեմ Փարիզում»։ Արևմուտք տեղափոխվելը վաղուց նրանց երազանքն է եղել, և հիմա թվում է, թե այդ հնարավորությունը բացվում է։

Շատերն այդ հեռանկարը դրական են գնահատում։ Սակայն նրանք նույնպես հաճախ մոլորվում են՝ Եվրոպայում իրենց ապագան պատկերացնելով զբոսաշրջային բուկլետների և գովազդային պատկերների միջոցով։ Իրականում, մշտական բնակության նպատակով տեղափոխվելիս ամեն ինչ բոլորովին այլ է լինում։ Բայց մարդիկ հավատում են այն պատկերին, որն իրենց մտքում են ստեղծել, և կարծում են, թե ամեն ինչ կլինի այնպես, ինչպես երազում են, այլ ոչ թե այնպես, ինչպես իրականում կարող է լինել»,- ընդգծել է Սոլոննիկովը։