«Սոյուզմոլոկո»-ն գնահատել է Հայաստանից կաթնամթերքի ներմուծման սահմանափակման ազդեցությունը ՌԴ-ի վրա

Հայաստանից կաթնամթերքի մատակարարումների սահմանափակումները կրիտիկական ազդեցություն չեն ունենա Ռուսաստանի ներքին շուկայի վրա։ Ներքին շուկան լիովին ապահովված է անհրաժեշտ ողջ կաթնամթերքով։ Այս մասին ՏԱՍՍ-ին հայտնել են Կաթ արտադրողների ազգային միությունից («Սոյուզմոլոկո»)։

«Հայաստանից կաթնամթերքի ներմուծման վրա «Ռոսսելխոզնադզոր»-ի սահմանած սահմանափակումները կրիտիկական ազդեցություն չեն ունենա ռուսական շուկայի վրա։ Ռուսական շուկան լիովին ապահովված է անհրաժեշտ ողջ կաթնամթերքով։ Հայաստանից ներմուծման սահմանափակումները չեն հանգեցնի տեսականու կրճատման կամ գների բարձրացման։ Խոշոր ներմուծողներն ու առևտրային ցանցերն արագորեն վերակողմնորոշվում են դեպի այլընտրանքային մատակարարներ, իսկ սեփական գյուղատնտեսության զարգացումն ու Բելառուսից գերիշխող մատակարարումները երաշխավորում են կայունությունը», — ասված է հաղորդագրության մեջ։

«Սոյուզմոլոկո»-ի տվյալներով՝ 2025 թվականին Ռուսաստանի ինքնաբավությունը կաթնամթերքի հարցում գերազանցել է 85%-ը։ Ընդ որում, հիմնական մատակարարը՝ ողջ ներմուծման շուրջ 90% ճնշող մասնաբաժնով, Բելառուսի Հանրապետությունն է։

«Մատակարարումների ընդհանուր ծավալում ՀՀ-ի մասնաբաժինն աննշան էր, և այդ երկրից ներմուծման դադարեցումը վաճառասեղաններին դեֆիցիտ չի ստեղծի», — ընդգծել են միությունից։

Ինչ վերաբերում է տեսականուն, ապա ՀՀ-ից ՌԴ ներմուծվող կաթնամթերքի հիմնական մասը ավանդաբար բաժին է ընկնում պանիրներին (օրինակ՝ «չանախը», «լոռին» և «սուլուգունին»)։

«Այս ապրանքատեսակների ներմուծումն արդեն իսկ ամբողջությամբ արգելված էր 2023 թվականի ապրիլի 5-ից, և միայն 2026 թվականի ապրիլին է «Ռոսսելխոզնադզոր»-ը մատակարարումների թույլտվություն տվել չորս ընկերության։ Հետևաբար, ընթացիկ որոշումը նոր արգելք չէ, այլ ավելի շուտ նախկինում սահմանված սահմանափակումների ճշգրտում», — հավելել են միությունում։