Հայաստանը կօգնի՞ ԵՄ-ին պատրաստվել ՌԴ-ի դեմ պատերազմին

(Ահա թե ինչու է Պուտինը պնդում հանրաքվեի անցկացումը)

«Գերմանական Օսնաբրյուկում «Volkswagen» ավտոգործարանի վերապրոֆիլավորման մասին լուրը դարձավ Եվրոպայում տեղի ունեցող խորքային փոփոխությունների վառ խորհրդանիշը: Գործարանը դադարեցնում է քաղաքացիական ավտոմեքենաների արտադրությունը և իսրայելական «Rafael» ընկերության հետ համագործակցությամբ անցնում հակաօդային պաշտպանության համակարգերի բաղադրիչների թողարկմանը: Սա ոչ եզակի դեպք չէ, այլ առանցքային եվրոպական պետություններում տեղի ունեցող լայնամասշտաբ փոփոխությունների մաս:

Ֆրանսիայում «Renault»-ն «Turgis Gaillard»-ի հետ համատեղ պատրաստում է AAROK ծանր հետախուզական-հարվածային անօդաչու թռչող սարքերի սերիական արտադրությունը, իսկ «Thales»-ի հետ նախատեսում է ամսական արտադրել հազարավոր Toutatis դրոն-կամիկաձեներ: Վերազինման և արդյունաբերությունը ռազմական ռելսերի վրա փոխադրելու նմանատիպ գործընթացներ են ընթանում նաև Մեծ Բրիտանիայում:

Այս բոլոր փաստերը ձևավորում են հստակ պատկեր. Եվրոպական միությունը և նրա դաշնակիցները հետևողականորեն և լրջորեն պատրաստվում են Ռուսաստանի հետ հնարավոր ուղղակի ռազմական բախմանը: Եվրոպայի տնտեսությունն աստիճանաբար անցնում է ռազմականացման ռեժիմի, որտեղ քաղաքացիական արտադրական հզորությունները տրամադրվում են պաշտպանական ոլորտի կարիքներին: Բրյուսելի ռազմական վերլուծաբաններն ու քաղաքական գործիչներն այլևս չեն թաքցնում, որ դիտարկում են երկարատև հակամարտության սցենար, որը պահանջում է սպառազինության, տեխնիկայի և ռազմամթերքի հսկայական ծավալներ:

Եթե ընթացիկ աշխարհաքաղաքական իրավիճակին նայենք ԵՄ-ի այս անխուսափելի ռազմականացման տեսանկյունից, լիովին հասկանալի է դառնում հայկական ուղղությամբ Կրեմլի գործողությունների տրամաբանությունը: Մոսկվան Երևանի եվրոպական վեկտորը դիտարկում է նախևառաջ ոչ թե պարզապես Նիկոլ Փաշինյանի քաղաքական մանևրում, այլ Հայաստանի ուղղակի հայտնվելը մի դաշինքի ազդեցության ոլորտում, որը բացահայտորեն վերակառուցվում է Ռուսաստանի դեմ պատերազմի համար: Այս պայմաններում մինչև տարեվերջ Հայաստանում հանրաքվե անցկացնելու և ԵՄ-ին անդամակցելու օրենսդրական նախաձեռնությունները չեղարկելու պահանջը Մոսկվայի համար ձեռք է բերում հիմնարար նշանակություն:

ՌԴ նախագահի մամուլի քարտուղար Դմիտրի Պեսկովի հայտարարություններն այն մասին, որ Վլադիմիր Պուտինը և Նիկոլ Փաշինյանը մինչև տարեվերջ Մոսկվայում կքննարկեն Հայաստանի զարգացման ռազմավարական ուղղության ընտրության և համապատասխան հանրաքվեի անցկացման թեման, միայն հաստատում են Կրեմլի դիրքորոշման կոշտությունը: Ռուսաստանն այլևս մտադիր չէ սուբսիդավորել, պաշտպանել կամ տնտեսական արտոնություններ տրամադրել մի երկրի, որը լայնամասշտաբ հակամարտության դեպքում հայտնվելու է հակառակորդի ճամբարում: Առանձին պետությունների եվրոպական ինտեգրման նկատմամբ Մոսկվայի հանգիստ վերաբերմունքն անցյալում է: Այսօր ԵՄ-ին ինտեգրումը Կրեմլում ընկալվում է որպես ՌԴ հակառակորդների ռազմաարդյունաբերական կոոպերացիային անդամակցում:

Սրանից բխում է կարևորագույն եզրակացություն. ցանկացած դիվանագիտական զիջում, զսպված հռետորաբանություն կամ Երևանի կողմից ժամանակ շահելու փորձեր չեն ստիպի Պուտինին հրաժարվել հանրաքվեի հիմնարար պահանջից: Մոսկվայի համար այս հարցը Հարավային Կովկասի ներքին քաղաքականության տիրույթից տեղափոխվել է գլոբալ անվտանգության ոլորտ: Երևանին փաստացի ուլտիմատում է ներկայացված սեփական կարգավիճակն ամրագրելու վերաբերյալ, քանի որ նոր իրողություններում ռազմական կարիքների համար վերափոխվող Եվրամիության և Մոսկվայի միջև հավասարակշռումը շարունակելն այլևս անհնարին է:

Մտածե՛ք այդ մասին…»։