Պուտինը հարցը կտրուկ կդնի․ Փաշինյանը պետք է վերջապես կողմնորոշվի․ Ռոբերտ Ուստյան

Քաղաքագետ Ռոբերտ Ուստյանը Alpha News-ին մեկնաբանել է ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի առաջիկա հանդիպումը, ինչպես նաև Երևանի և Մոսկվայի միջև հարաբերությունների հետագա զարգացման հնարավոր ընթացքը։

«Իմ կարծիքով՝ Վլադիմիր Պուտինի և Նիկոլ Փաշինյանի առաջիկա հանդիպումը Մոսկվայի և Երևանի միջև քաղաքակիրթ բաժանման սկիզբը կլինի։ Վլադիմիր Պուտինը հարցը կտրուկ է դրել և ցանկանում է, որպեսզի Նիկոլ Վովայի Փաշինյանը վերջապես կողմնորոշվի՝ որ ուղղությամբ է ցանկանում տանել Հայաստանը։

Սակայն Հայաստանի վարչապետը շատ հստակ հայտարարում է, որ այս պահին չի ցանկանում դա անել։ Եվ այստեղ, թերևս, տրամաբանությունը հասկանալի է․ նա ցանկանում է շահույթ ստանալ և ամեն կերպ ցույց տալ Եվրամիությանը, որ հոգով ու սրտով Բրյուսելում է, որ կցանկանար այնտեղ գտնվել», — ասել է Ուստյանը։

Քաղաքագետը նշել է, որ Մոսկվան պետք է հաշվի առնի Երևանի արտաքին քաղաքականության եվրոպական ուղղության խորացման հնարավոր հետևանքները։ Նրա խոսքով՝ եթե Հայաստանի իշխանությունները չկողմնորոշվեն արտաքին քաղաքականության ուղղության հարցում, Ռուսաստանը կարող է Հայաստանի հետ հարաբերություններում դիմել ավելի կոշտ քայլերի։

«Միջազգային հարաբերությունների այս փուլում, երբ տեղի է ունենում բևեռների հստակեցում, և երբ այնպիսի երկրները, ինչպիսին Հայաստանն է, որոնք որոշակի պահի պարտավոր են կողմնորոշվել՝ ուր են ցանկանում գնալ և ում հետ են ցանկանում լինել, վաղ թե ուշ պետք է պատասխան տան, երբ ընթանում է զրոյական գումարով խաղ, և երբ խաղադրույքը ոչ ավելի, ոչ պակաս նոր աշխարհակարգն է, այլևս հնարավոր չէ շարունակել պղտոր ջրում ձուկ որսալ, ինչպես փորձում էր անել պարոն Փաշինյանը։

Հենց այդ պատճառով Ռուսաստանը պետք է հասկանա, թե ինչ խաղաքարտերով է մնում ինչպես Հարավային Կովկասում, այնպես էլ այլ ուղղություններում։ Որքան էլ կոշտ հնչի, Մոսկվայի համար այսօր կարող է կործանարար լինել պետության ղեկավար ունենալը, որը կարծես թե ձեզ հետ է, բայց միևնույն ժամանակ ձեզ հետ չէ, և ասում է, որ ձեր կողքին կլինի այնքան ժամանակ, քանի դեռ իրեն այլ ճամբար չեն հրավիրել», -հավելել է Ուստյանը։