Դուք զիջում եք ՀՀ սահմանադրությունը՝ կատարելով Ալիևի հերթական պահանջը․ Ղահրամանյանը՝ Փաշինյանին
18 Նոյեմբերի 2026, 17:05
Դուք զիջում եք ՀՀ Սահմանադրությունը՝ փորձելով կատարել Ալիևի հերթական պահանջը։ Այս մասին Ազգային ժողովում կառավարության հետ հարցուպատասխանի ժամանակ հայտարարել է «Ուժեղ Հայաստան» խմբակցության պատգամավոր Մարիաննա Ղահրամանյանը։
Անդրադառնալով Հայաստանի և Ադրբեջանի միջև խաղաղության նախաստորագրված համաձայնագրի շուրջ կառավարության վարած քաղաքականությանը՝ պատգամավորը նշել է, որ փաստաթղթի 17 կետերից և ոչ մեկում չկա պահանջ՝ փոփոխելու ՀՀ Սահմանադրությունը։
Ղահրամանյանը նաև փոխվարչապետ Մհեր Գրիգորյանից պարզաբանում է խնդրել Ադրբեջանի ԱԳ նախարար Ջեյհուն Բայրամովի հայտարարության վերաբերյալ։ Սակայն հարցին պատասխանել է վարչապետ Նիկոլ Փաշինյանը, ինչի արդյունքում ծավալվել է սուր քաղաքական բանավեճ։
Ի պատասխան՝ Փաշինյանը քննադատել է նախկին իշխանություններին՝ մեղադրելով նրանց սահմանադրական հանրաքվեների արդյունքները կեղծելու մեջ։ Գործող Սահմանադրությունն էլ բնութագրել է որպես «օլիգարխիայի, կոռումպացված դատական և պետական համակարգի ու ընտրակեղծիքների սահմանադրություն»։
«Ես ասում եմ՝ Հայաստանի Հանրապետությունը մենք ձեր սարքած թակարդից հանել ենք»,- նշել է Փաշինյանը։