Հոգեշնորհ Տեր Գարեգին վարդապետ Համբարձումյանը Մյունխենում ներկայացրել է Արցախի ամբողջական շրջափակման հետևանքով ստեղծված հումանիտար աղետը

Սեպտեմբերի 12-14-ը Գերմանիայի Մյունխեն քաղաքում տեղի է ունեցել Գերմանիայի Կաթոլիկ եկեղեցու «Ռենովաբիս» բարեգործական կազմակերպության 27-րդ միջազգային համաժողովը՝ «Ազատությունն, ինչպես ես եմ ընկալում… Եվրոպան նոր զարթոնքի, հիասթափության և վտանգի միջև» խորագրի ներքո։

Ն.Ս.Օ.Տ.Տ. Գարեգին Երկրորդ Ծայրագույն Պատրիարքի և Ամենայն Հայոց Կաթողիկոսի օրհնությամբ միջազգային համագումարին Մայր Աթոռ Սուրբ Էջմիածինը ներկայացրել է Արցախի հոգևոր-մշակութային ժառանգության պահպանման հարցերով գրասենյակի և Մայր Աթոռի Քարոզչական կենտրոնի տնօրեն Հոգեշնորհ Տեր Գարեգին վարդապետ Համբարձումյանը։

Ամենամյա համաժողովին բարձրաձայնվում և քննարկվում են Կենտրոնական և Արևելյան Եվրոպայում առկա տարբեր խնդիրներ։ Այս առումով համաժողովը հանդիսանում է Արևելք-Արևմուտք երկխոսության կարևոր հարթակ։ Հայր Սուրբը համագումարի ընթացքում հանդես է եկել բանախոսությամբ՝ ներկայացնելով Արցախի ամբողջական շրջափակման հետևանքով ստեղծված հումանիտար աղետը և կարևորել է համապատասխան գործողություններ ձեռնարկելու հրատապությունը։