Ամենայն Հայոց Կաթողիկոսն ընդունել է ԻԻՀ իսլամական մշակույթի և հաղորդակցության կազմակերպության ղեկավարին
04 Մայիսի 2024, 10:00
Մայիսի 2-ին Ն․Ս․Օ․Տ․Տ․ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է ԻԻՀ Իսլամական մշակույթի և հաղորդակցության կազմակերպության ղեկավար Մոհամմադ Մեհդի Իմանիփուրի գլխավորած պատվիրակությանը։
Հանդիպմանը ներկա է եղել նաև ՀՀ-ում Իրանի Իսլամական Հանրապետության արտակարգ և լիազոր դեսպան Մեհդի Սոբհանին։
Նորին Սրբությունը գոհունակությամբ անդրադարձել է երկու ժողովուրդների փոխհարաբերություններին և սերտ գործակցությանը, որոնք դրսևորվում են նաև այսօր՝ մեր ժողովրդի համար դժվարին ժամանակներում։
Այս առիթով Վեհափառ Հայրապետն իր մտահոգություններն է արտահայտել Ադրբեջանի կողմից Հայաստանին պարտադրվող զիջումների և ինքնիշխան տարածքների նկատմամբ շարունակվող ոտնձգությունների առնչությամբ, որոնք խոչնդոտում են տարածաշրջանում կայուն խաղաղության ու անվտանգային միջավայրի հաստատման գործընթացներին։ Հայոց Հովվապետը խոսել է նաև արցախահայության արդար իրավունքների պաշտպանության կարևորության և Արցախի հոգևոր-մշակութային ժառանգության պահպանության խնդիրների մասին։
Անդրադարձ կատարելով ԻԻՀ դեսպանատան մշակույթի կենտրոնի՝ Մայր Աթոռի հետ համատեղ իրականացրած միջոցառումներին՝ Նորին Սրբությունը կարևոր նկատել է մշակույթների և կրոնների միջև երկխոսությունը, ինչը նպաստում է ժողովուրդների միջև համերաշխության ձևավորմանը և խաղաղ գոյակցությանը:
Վեհափառ Հայրապետն ի դեմս պրն. Մեհդի Իմանիփուրի շնորհակալություն հայտնել է Իրանի իշխանություններին Հայաստանին ցուցաբերվող զորակցության համար՝ մեծապես գնահատելով նաև Իրանում հայկական հոգևոր-մշակութային արժեքների և հայ համայնքի նկատմամբ դրսևորվող հոգատար վերաբերմունքը:
Իր հերթին պրն․ Մոհամմադ Մեհդի Իմանիփուրը Հայոց Հայրապետին ներկայացրել է երկու երկրների միջև կրթական, մշակութային կապերի ամրապնդմանն ուղղված ծրագրերը։
Իսլամական մշակույթի և հաղորդակցության կազմակերպության ղեկավարը վստահություն հայտնել է, որ կրոնների միջև երկխոսությունն ու համագործակցությունը կարևոր խթան կհանդիսանա ժողովուրդների փոխճանաչողության, բարեկամության ամրապնդման և տարածաշրջանում առկա մարտահրավերների հաղթահարման գործում:
Հիմա եթերում
