Ազամատ, հոթ-դոգ և կինո. Քեն Դավիթյանի երեք գլխավոր կիրքը

Հունիսի 19-ին իր ծննդյան օրն է նշում ամերիկահայ դերասան Քեն Դավիթյանը, ով հայտնի է իր վառ խարիզմայով և կատակերգական տաղանդով: Նրա ուղին կինոյում դարձավ համառության և մասնագիտական նվիրվածության օրինակ։

Նա ծնվել է 1953 թվականին Լոս Անջելեսում, մեծացել է էմիգրանտների ընտանիքում, որոնք մի շարք փորձություններ են հաղթահարել ԱՄՆ-ում նոր կյանք սկսելու համար։ Դավիթյանը փոքր տարիքից երազել է կինոյի մասին՝ ոգեշնչվելով դասական Հոլիվուդի աստղերից։ Սակայն նրա ճանապարհը դեպի կինո դյուրին չէր․ մինչև հաջողությանը հասնելը նա աշխատում էր ընտանեկան բիզնեսում՝ զբաղվելով թափոնների վերամշակմամբ։

Նրա առաջին հաջողությունը 1990-ականներին ֆիլմերում փոքր դերերն էին։ Նրան ճանաչում բերեց «Բորատ» (2006) ֆիլմը: Նրա կերպարը՝ Ազամատ Բագատովը, հանդիսատեսին գրավել է իր անկրկնելի կատակերգությամբ, իսկ երկխոսություններում արևմտահայերենի օգտագործումը նրան յուրահատուկ երանգ է հաղորդել։

«Բորատ»-ից հետո Դավիթյանը շարունակել է նկարահանվել՝ հայտնվելով այնպիսի ֆիլմերում, ինչպիսիք են «Ծանոթություն սպարտացիների հետ», «Լարիր գալարներդ» և «Արտիստը»։ Ճանաչելի ոճը թույլ տվեց նրան իր տեղը գտնել որպես երկրորդ պլանի դերասան, որը միշտ անմոռանալի տպավորություն է թողնում դիտողների վրա:

Բացի կինոյից, նա իրեն դրսևորել է նաև ռեստորանային բիզնեսում՝ 2003 թվականին Լոս Անջելեսում բացելով «The Dip» հաստատությունը, որը մասնագիտացած է հոթ-դոգերի պատրաստման մեջ։

Դավիթյանը շարունակում է կարևոր դեմք մնալ հայկական սփյուռքի և Հոլիվուդի համար՝ իր օրինակով ոգեշնչելով երիտասարդ դերասաններին: