Բաքվի բանտում հայ գերիների մաշկից այրելով հեռացվել են խաչով դաջվածքները․ Սահակյան

Բաքվի բանտում պահվող հայ գերիների մաշկից այրելով հեռացվել են խաչի տեսքով դաջվածքները։ Այսօր հրավիրված ասուլիսի ժամանակ այդ մասին ասաց իրավապաշտպան, ՄԻԵԴ-ում հայ գերիների շահերի ներկայացուցիչ Սիրանուշ Սահակյանը։

«Մենք տեսել ենք թիրախավորված գործողություններ կրոնական խորհրդանիշների առնչությամբ։ Խաչ դաջվածքների պարագայում դրանք այրվել են, մաշկի վրայից խոշտանգման ճանապարհով վերացվել է խաչը։ Կամ, թեև որոշ սահմանափակ գրքեր տրամադրվել են հայ բանտարկյալներին, սակայն արգելվել է Աստվածաշնչի փոխանցումը կամ եղել են դեպքեր, երբ հարկադրել են Ղուրան ընթերցել»,- նշեց Սահակյանը։

Նա ընդգծեց, որ այս ամենն արձանագրվել է նաև միջազգային զեկույցներում։

Սահակյանի խոսքով՝ այս ամենը վկայում է, որ քրիստոնյա լինելը Բաքվի բանտում ավելի խոցելի է և միգուցե քրիստոնեական մշակույթ կրող լինելը դժվարացնում է նաև քաղաքակրթական երկխոսությունն Ադրբեջանի հետ։

Նա անդրադարձավ նաև միջազգային հանրության արձագանքին Բաքվում պահվող հայ գերիների կրոնական ազատությունների սահմանափակման վերաբերյալ, որոնք դատապարտում են ու մտահոգություններ են հայտնում։ Օրինակ, ՄԱԿ-ի խոշտանգումների դեմ կոմիտեն հստակ խոսում է հայ գերիների խոշտանգումների վերաբերյալ, ԱՄՆ կրոնական հարցերով զբաղվող արտաքին հանձնաժողովը ևս իր տարեկան զեկույցում ուղիղ անդրադարձ է կատարել Բաքվում գտնվող գերիների կրոնական իրավունքների, ազատությունների խախտումների դրվագներին։