Տիգրան Բարսեղյանը՝ գոլի հեղինակ

Տիգրան Բարսեղյանը շարունակում է իր արդյունավետ շարքը Սլովակիայի առաջնությունում։ Հայ կիսապաշտպանը Բրատիսլավայի «Սլովանի» կազմում աչքի է ընկել երրորդ անընդմեջ խաղում։

Սլովակիայի առաջնության նախավերջին տուրում «Սլովանը», որն արդեն երկրի չեմպիոնի կարգավիճակում էր, արտագնա խաղում 2:1 հաշվով հաղթել է «Պոդբրեզովային»։ Հանդիպումը կայացել է մայիսի 9-ին Պոդբրեզովայի ZELPO Arena մարզադաշտում։ Տանտերերը բացեցին հաշիվը, սակայն «Սլովանը» կարողացավ վերադառնալ խաղ։ Հաշիվը հավասարեցրել է Տիգրան Բարսեղյանը, որը դիպուկ հարված է կատարել իր թույլ՝ աջ ոտքով։ Հայաստանի հավաքականի 32-ամյա ֆուտբոլիստի համար սա արդեն երրորդ գոլն էր վերջին երեք խաղում։

Ընդհանուր առմամբ, ընթացիկ մրցաշրջանում Բարսեղյանի հաշվին կա 11 գոլ։ Հայ կիսապաշտպանը ուժեղ է անցկացնում մրցաշրջանի վերջնամասը և կրկին հաստատում է «Սլովանի» հարձակման գծի առանցքային խաղացողներից մեկի իր կարգավիճակը։

Հայկական հետք է եղել նաև «Պոդբրեզովայի» կազմում։ Հայաստանի երիտասարդական հավաքականի կիսապաշտպան Դավիթ Հակոբյանը խաղադաշտ է դուրս եկել տանտերերի մեկնարկային կազմում և խաղացել 62 րոպե։

Այս հաղթանակից հետո «Սլովանը» շարունակել է չեմպիոնական մրցաշրջանի հաջող ավարտը։ Բրատիսլավայի թիմը նախօրոք ապահովել էր չեմպիոնական տիտղոսը, սակայն նույնիսկ դրանից հետո չի նվազեցրել տեմպը Սլովակիայի առաջնության եզրափակիչ տուրերում։