Ալեքսիս Օհանյանը ցուցադրել է Տիգրան Մեծի պատկերով հազվագյուտ հայկական մետաղադրամ

Ամերիկահայ միլիոնատեր, հանրահայտ «Reddit» առցանց ռեսուրսի հիմնադիրներից Ալեքսիս Օհանյանը համացանցում տեսանյութ է հրապարակել, որում ցույց է տվել Տիգրան Մեծի պատկերով մ.թ.ա. 95 թ․ թվագրվող հազվագյուտ հայկական մետաղադրամ, ինչպես նաև հայոց պատմության մասին պատմական էքսկուրս է կատարել։

«Այս մետաղադրամը հատվել է մ.թ. ա. մոտ 95 թվականին, և այն դրված է իմ սեղանին 2024 թվականին։ Եթե դուք հայ եք կամ պարզապես պատմության սիրահար, ապա գիտեք Տիգրան Մեծի մասին, և թե ինչպես է նրա գահակալության օրոք Հայաստանի թագավորությունն ընդարձակվել և դարձել Հռոմի Հանրապետության արևելքում ամենահզոր պետությունը։ Սուպեր հազվագյուտ մետաղադրամների այս շարքի վրա պատկերված է Հալլեի գիսաստղը, որը հայտնվել է Տիգրան Մեծի օրոք և համարվում էր հաջողության նշան։

Թեև ես էությամբ մետաղադրամների կոլեկցիոներ չեմ, բայց ես պարտավոր էի գնել այդ մետաղադրամը»,- տեսանյութում ասում է Ալեքսիս Օհանյանը: