Zildjian vs. Sabian. Ինչպես Ռոբերտ Զիլջյանը նոր շունչ տվեց հարվածային գործիքների ստեղծմանը
14 Հուլիսի 2025, 22:00
Zildjian ազգանունը հայտնի է երաժշտական աշխարհում, և չկա մի երաժիշտ, որ չճանաչի այն: Ամեն ինչ սկսվեց 1618 թ․ Կոստանդնուպոլսում, երբ հայ ալքիմիկոս Ավետիս Զիլջյանն իր եղբոր հետ ստեղծեց ոսկու, արծաթի և պղնձի եզակի համաձուլվածք։ Դրանից պատրաստված ծնծղաները օգտագործվում էին Օսմանյան բանակում։
Այսպես ծնվեց «Zildjian» ընկերությունը՝ այսօր աշխարհում հարվածային գործիքների ամենախոշոր արտադրողը, որը վերահսկում է համաշխարհային շուկայի ավելի քան 65%-ը։ Համաձուլվածքի գաղտնիքը փոխանցվում էր միայն ժառանգաբար, բանավոր կերպով, և մինչ օրս մնում է գաղտնիք։
20-րդ դարում ընտանեկան գործը շարունակեց Ռոբերտ (Բոբ) Զիլջյանը՝ ընկերության ամերիկյան մասնաճյուղի հիմնադիր Ավետիս III-ի թոռը։ Նա ծնվել է 1923 թ․ հուլիսի 14-ին ԱՄՆ-ում, մանկուց աշխատել է Բոստոնում հոր գործարանում։ Սակայն 1981 թ․ եղբոր՝ Արմանի հետ ընկերության կառավարման շուրջ առաջացած կոնֆլիկտից հետո Ռոբերտը լքեց Zildjian-ը և հիմնեց իր սեփական ապրանքանիշը՝ Sabian-ը։ Անվանումը նա կազմել է իր երեխաների անուններից՝ Sally, Billy և Andy։
Հետաքրքիր փաստ. Ռոբերտ Զիլջյանը ոչ միայն կրկնօրինակեց ընտանեկան գործը, այլև նորովի հանդես եկավ։ «Սաբիան» ընկերությունն աշխարհում երաժշտական ծնծղա ափսեներ արտադրող երկրորդ խոշոր ընկերությունն է, որ արտադրանքն օգտագործվում է ռոք, ջազ, սիմֆոնիկ և էթնիկ երաժշտության մեջ։ Ռոբերտն անձամբ վերահսկում էր որակը, մշակում էր նոր մոդելներ և շփվում երաժիշտների հետ՝ «Sabian»-ը վերածելով հոգի ունեցող ապրանքանիշի։
Այսօր հարվածային գործիքներ արտադրող այս ընկերության ապրանքանիշն աշխարհում համարվում է առաջատար և երաժշտական գործիքներ է մատակարարում հայտնի շատ խմբերի:
Ռոբերտ Զիլջյանը մահացել է 2013 թ․ 89 տարեկանում։ Նրա կյանքի կարգախոսը՝ «Ընտանիքը բիզնես է, իսկ բիզնեսը՝ ընտանիք», դարձել է «Sabian»-ի կորպորատիվ մշակույթի հիմքը։
Ռոբերտ Զիլջյանն օրինակ է այն բանի, թե ինչպես պահպանել ավանդույթը՝ միաժամանակ ստեղծելով միանգամայն նորը։ Նրա պատմությունը ձայնի պատմություն է, որը չի բաժանվում, այլ բազմապատկվում է։
Հիմա եթերում
