Արփա Ստեփանյանը նշանակվել է Լոս Անջելեսի շրջանի Գերագույն դատարանի դատավոր

Կալիֆոռնիայի նահանգապետ Գևին Նյուսոմը Լոս Անջելեսի շրջանի Գերագույն դատարանի դատավոր է նշանակել ամերիկահայ իրավաբան Արփա Ստեփանյանին։ Ավելի քան երկու տասնամյակի մասնագիտական փորձ ունեցող Ստեփանյանը համալրում է Միացյալ Նահանգների խոշորագույն դատական համակարգերից մեկի դատավորների կազմը։

Այս նշանակումը հերթական կարևոր ձեռքբերումն է Հարավային Կալիֆոռնիայի ամերիկահայ իրավաբանական համայնքի համար, որտեղ Հայ իրավաբանական միությունը տարիներ շարունակ աշխատանքներ է իրականացնում դատական համակարգում հայերի ներկայացվածությունն ընդլայնելու ուղղությամբ։

Լոս Անջելեսում գործող Հայ իրավաբանական միությունը շնորհավորել է Արփա Ստեփանյանին՝ ընդգծելով նրա հարուստ մասնագիտական ուղին։ Ստեփանյանի գործունեությունն աչքի է ընկնում քրեական պաշտպանության, անհատական իրավունքների ապահովման և իրավաբանական աջակցության սահմանափակ հնարավորություններ ունեցող համայնքներին ծառայելու հանձնառությամբ։

2015 թվականից նա հանդիսանում է «Weiss and Stepanian LLP» իրավաբանական ընկերության գործընկեր՝ մասնագիտանալով քրեական գործերով պաշտպանության և քրեական հետապնդման ենթարկվող անձանց սահմանադրական իրավունքների պաշտպանության ոլորտներում։

Իր պրակտիկայի ընթացքում Ստեփանյանը վարել է հազարավոր քրեական գործեր դատավարության բոլոր փուլերում՝ ներառյալ մեղադրանքի առաջադրման նիստերը, նախնական լսումներն ու երդվյալ ատենակալների մասնակցությամբ դատավարությունները։ Նրա փորձառությունն ընդգրկում է բարդ ու ծանր հանցագործությունների քննություն․ նա հասել է արդարացման դատավճիռների այնպիսի գործերով, որոնցով ամբաստանյալներին սպառնում էր ցմահ ազատազրկում, ինչպես նաև բանակցությունների միջոցով ապահովել է մեղադրանքների մեղմացում և պատժաչափերի նվազեցում։

Մինչ մասնավոր sektօր տեղափոխվելը Ստեփանյանը ծառայել է որպես հանրային պաշտպանի տեղակալ Ռիվերսայդի շրջանի Հանրային պաշտպանի գրասենյակում, ինչպես նաև աշխատել է «Inland Counties Legal Services» կազմակերպությունում։ Այս պաշտոնները հիմնարար են եղել անվճարունակ և խոցելի քաղաքացիների իրավունքների պաշտպանության գործում։

Արփա Ստեփանյանի մասնագիտական ներդրումը բարձր է գնահատվել իրավաբանական համայնքի կողմից։ Նա ընդգրկվել է Հարավային Կալիֆոռնիայի «Super Lawyers Rising Star» հեղինակավոր ցանկում, «Glendale News-Press» թերթի ընթերցողների կողմից ճանաչվել է Գլենդել քաղաքի լավագույն իրավաբան, ինչպես նաև Ռիվերսայդի շրջանի Հանրային պաշտպանի գրասենյակի կողմից արժանացել է «Տարվա իրավաբան» կոչմանը (ոչ ծանր հանցագործությունների գործերով)։ Նա նաև հեղինակել է մի շարք մասնագիտական հոդվածներ՝ անդրադառնալով դատավորների օգնականների էթիկային և իրավապահ մարմինների դեմ քաղաքացիների հայցեր ներկայացնելու իրավունքներին։

Միության ամենամյա հանդիսավոր երեկոյի ընթացքում Կալիֆոռնիայի նահանգապետի դատական նշանակումների հարցերով քարտուղար Լուիս Սեսպեդեսը բարձր է գնահատել Հայ իրավաբանական միության դերը՝ նշելով, որ այն մարմնավորում է օրենքի գերակայության վրա հիմնված բազմակարծիք հասարակության արժեքները և ամրապնդում մշակութային ու քաղաքական համայնքների կապերը։

Դատավոր Ստեփանյանն իր հերթին պատրաստակամություն է հայտնել շարունակելու ակտիվ մասնակցությունը հայկական իրավաբանական համայնքի կյանքին և աջակցելու երիտասարդ մասնագետներին։ Հայ իրավաբանական միությունը հաջողություն է մաղթել Արփա Ստեփանյանին Լոս Անջելեսի շրջանի Գերագույն դատարանի դատավորի պատասխանատու պաշտոնում։