Արտակարգ արբիտրի կայացրած ցանկացած որոշում պարտադիր է կողմերի համար․ Սիրանուշ Սահակյան
02 Օգոստոսի 2025, 00:25
Գլոբալ առումով սեփականության իրավունքի պաշտպանության խնդիր կա։ Այս մասին Alpha News-ի եթերում ասել է «Միջազգային և համեմատական իրավունքի կենտրոն» ՀԿ նախագահ Սիրանուշ Սահակյանն՝ անդրադառնալով ՀԷՑ-ի վերաբերյալ միջազգային արբիտրաժի որոշմանը։
«Այս պարագայում գործ ունենք ներդրումային վեճի հետ՝ հաշվի առնելով, որ սեփականատերերը ոչ միայն ՀՀ քաղաքացի են, վերջիններս ունեն գործունեության կենսական կենտրոններ ՀՀ տարածքից դուրս, և Հայաստանում կատարված ներդրումները գտնվում են երկկողմ պայմանագրերի պաշտպանության տիրույթում»,- ասել է Սիրանուշ Սահակյանը։
Նա նշել է, որ արտակարգ արբիտրի կողմից կայացված ցանկացած որոշում պարտադիր է կողմերի համար։ «Պետք է նշեմ, որ արբիտրաժները գործում են հատուկ կանոնների համաձայն։ Եթե ուսումնասիրենք Ստոկհոլմի առևտրային պալատի արբիտրաժային ինստիտուտի կանոնները, կտեսնենք, որ ուղղակիորեն նշվում է՝ արբիտրաժի վճիռները, որոնք առնչվում են միջանկյալ հարցերին, ունեն պարտադիր բնույթ և պետք է կատարվեն պետությունների կողմից»,- հավելել է նա։
Այս որոշումը չկատարելը, իրավապաշտպանի խոսքով, իրավական հետևանքներ է առաջ բերելու։ «Սակայն դրանով չի սահմանափակվի։ Այստեղ ռեպուտացիոն բնույթի խնդիր կա»,- ընդգծել է նա։
Մանրամասները՝ տեսանյութում։
Հիմա եթերում
