Մոսկվայում կկայանա վիրտուոզ ջութակահար Սամվել Հայրապետյանի համերգը

Մարտի 1-ին՝ ժամը 19:00-ին, Մոսկվայի միջազգային Երաժշտության տանը տեղի կունենա վիրտուոզ ջութակահար Սամվել Հայրապետյանի և նրա բենդի համերգը՝ «Ռուսական ֆիլհարմոնիա» նվագախմբի մասնակցությամբ։ Հյուրերին սպասվում է մեծ շոու, որը միավորում է դասականն ու ժամանակակից հնչողությունը։

Ծրագրում ընդգրկված են Վիվալդիի, Ռախմանինովի, Գրիգի, Խաչատրյանի և Կոմիտասի ստեղծագործությունները՝ հեղինակային մշակումներով, ինչպես նաև «Scorpions», «Queen» խմբերի, Մայքլ Ջեքսոնի ռոք-հիթերը և «Գլադիատոր», «Ռոմեո և Ջուլիետ», «Երկրաշարժ» ֆիլմերի հայտնի սաունդթրեքները և հայտնի այլ մեղեդիներ։

Առանձնահատուկ մթնոլորտ կստեղծեն դուդուկի կախարդական հնչյունները՝ Վարդան Բալոյանի կատարմամբ։

Սամվել Հայրապետյանը հայտնի է որպես վիրտուոզ ջութակահար, կոմպոզիտոր և գործիքավորող։ Երաժիշտը հյուրախաղերով հանդես է գալիս Ռուսաստանում․ նրա վերջին շրջագայությունը ընդգրկել է քաղաքներ՝ Պսկովից մինչև Նովոսիբիրսկ։ Արդեն երեք տարի անընդմեջ նա մենահամերգներ է տալիս Երևանում։