Հայաստանը՝ լուրջ ռիսկերի և սպառնալիքների միջև․ «Ժողովուրդն է խոսում»
21 Փետրվարի 2026, 11:00
«Ժողովուրդն է խոսում»․ Alpha News-ի այս նախագծի շրջանակներում հարցախույզ ենք անցկացրել մայրաքաղաք Երևանում և ԱՄՆ-ի, Ռուսաստանի հայաշատ համայնքներում՝ պարզելու քաղաքացիների կարծիքը վերջին շրջանի կարևորագույն թեմաների շուրջ։
Անդրադառնալով Թուրքիայի հետ հարաբերությունների կարգավորմանը՝ հարցված քաղաքացիները նշել են, որ հաղորդակցությունը անհրաժեշտ է, սակայն դրա մակարդակն ու ձևաչափը առանձին քննարկման թեմա են։
«Կարծում եմ՝ դա անխուսափելի է։ Ուզենք թե ոչ, հարևանների հետ շփումից լիովին հրաժարվել հնարավոր չէ, հատկապես շրջափակման պայմաններում։ Հաղորդակցությունն անհրաժեշտ է, թեև պարտադիր չէ, որ այն վերածվի բարեկամության․ համագործակցությունը կարող է լինել զուտ գործնական և փոխշահավետ։ Ակնհայտ է, որ Թուրքիան մեզ բազմակի գերազանցում է ռազմական հզորությամբ։ Այսօր հավասար պայմաններում երկխոսություն վարելը գրեթե անհնար է․ Հայաստանը չունի բավարար ռեսուրսներ և ծովային ելք։ Մեր ուժը մտավոր ներուժն ու մտավորականությունն են, սակայն միայն դա բավարար չէ»,- նշել է հարցման մասնակիցներից մեկը։
Մեկ այլ քաղաքացի ընդգծել է, որ համագործակցությունը հնարավոր է, եթե այն նպաստի Հայաստանի տնտեսական աճին։
«Պետությունների միջև բարեկամությունը ցանկալի է, խաղաղությունն՝ առավել ևս։ Սակայն նման քայլերը պահանջում են նրբանկատ և հաշվենկատ դիվանագիտություն։ Տնտեսական համագործակցությունը հնարավոր է, իսկ իրական բարեկամությունը երկարատև գործընթաց է, որի համար անհրաժեշտ են սերունդներ։ Բաց սահմանները կարևոր են թեկուզ մշակութային փոխանակման տեսանկյունից․ շատ հայեր ցանկանում են այցելել Արևմտյան Հայաստան, տեսնել Կարսն ու Վանը։ Այդպիսի փորձառությունը կարող է նպաստել շփումների ձևավորմանը։ Սակայն պետք է հաշվի առնել իրականությունը․ Ադրբեջանում հայատյացությունը զանգվածային բնույթ ունի, մինչդեռ Հայաստանում նման երևույթ չկա», – նշել է նա։
Անդրադառնալով Հայաստանի անվտանգության հարցին՝ քաղաքացիները նշել են, որ երկիրը գտնվում է վտանգավոր և խոցելի իրավիճակում, քանի որ շրջապատված է ոչ բարեկամական հարևաններով։
Հիմա եթերում
