Լիաննա Հարությունյանը կբացի Տեներիֆեի օպերային թատրոնի նոր եթերաշրջանը

Հայտնի օպերային երգչուհի, սոպրանո Լիաննա Հարությունյանը հանդես կգա կոմսուհի Ալմավիվայի դերերգով՝ Վոլֆգանգ Ամադեուս Մոցարտի «Ֆիգարոյի ամուսնությունը» օպերայում, որով կմեկնարկի Տեներիֆեի օպերային թատրոնի (Ópera de Tenerife) 2026-2027 թթ. համերգաշրջանը։

Այն Լիսեուի օպերային թատրոնի և Տեներիֆեի Auditorio de Tenerife համերգասրահի համատեղ նախագիծն է։

Լիաննա Հարությունյանը ելույթ կունենա հոկտեմբերի 11-ին, 13-ին, 15-ին և 17-ին՝ Տեներիֆեի «Auditorio de Tenerife» համերգասրահում։

Բեմադրության ռեժիսոր Մարտա Պասոսը ստեղծել է ինքնատիպ բեմանկարչություն։ Բեմը ձևավորվել է հսկայական հարսանեկան տորթի տեսքով, որն արտացոլում է հասարակական հիերարխիան և դասակարգային տարբերությունները։ Արտիստների զգեստները նույնպես հիշեցնում են հրուշակեղեն։

Բեմադրության երաժշտական ղեկավարն է Պաբլո Գոնսալեսը, իսկ երգիչներին նվագակցելու է Տեներիֆեի սիմֆոնիկ նվագախումբը։

Լիաննա Հարությունյանն ավարտել է Կոմիտասի անվան պետական կոնսերվատորիայի դաշնամուրային և վոկալ բաժինները, այնուհետև ուսումը շարունակել Ֆրանսիայում։ Նա հանդես է եկել Նյու Յորքի Մետրոպոլիտեն օպերայում, Լոնդոնի Քովենթ Գարդենում, Փարիզի ազգային օպերայում և Մեծ թատրոնում։