ԱՄՆ Կոնգրեսի վերջին ընտրությունները Դոնալդ Թրամփի համար աղետ էին․ Դանիլա Գուրեև

Քաղաքագետ Դանիլա Գուրեևը Alpha News-ին մեկնաբանել է ԱՄՆ-ում կայացած՝ Սենատի և Ներկայացուցիչների պալատի ընտրությունների արդյունքները։

Ըստ քաղաքագետի՝ օրենսդիր իշխանության երկու պալատներում էլ պարտությունը կբարդացնի Թրամփի վարչակազմի՝ ինչպես ներքին, այնպես էլ արտաքին քաղաքականության ոլորտներում օրենսդրական նախաձեռնությունների կյանքի կոչումը։

«ԱՄՆ-ում կայացած վերջին ընտրություններին կարելի է անդրադառնալ միանգամից մի քանի տեսանկյունից։ Առաջին հերթին՝ Դոնալդ Թրամփի տեսանկյունից։ Նրա համար այս ընտրություններն, անշուշտ, աղետ են։ Եթե նախկինում Դոնալդ Թրամփը կարող էր համեմատաբար ազատորեն գործել ներքին քաղաքականության ոլորտում, ընդունել իր նախընտրած օրենքներն ու առաջ շարժվել իրեն ցանկալի բոլոր ուղղություններով, ապա այժմ այդ խնդիրն ավելի է բարդանալու։

Դա պայմանավորված է մի շարք գործոններով, քանի որ Դոնալդ Թրամփի առաջարկած օրենսդրական նախաձեռնությունները, միևնույն է, պետք է անցնեն խորհրդարանի հաստատման գործընթացը։ Իհարկե, կան այդ գործընթացը շրջանցելու եղանակներ, սակայն դա, այնուամենայնիվ, շատ ավելի բարդ խնդիր է։

Մոտավորապես նույնպիսի խնդիրների Դոնալդ Թրամփը բախվել էր նաև իր առաջին նախագահական ժամկետի ընթացքում։ Ինչպես հիշում ենք, այն ժամանակ ևս ականատես եղանք ներքաղաքական վերնախավի լուրջ հակասությունների, երբ գործադիր իշխանությունը բախվում էր օրենսդիր իշխանության հետ, և կողմերը չէին կարողանում ընդհանուր հայտարարի գալ։

ԱՄՆ պետության համար սա, ըստ էության, բավականին լուրջ փոփոխություն է։ Եթե նախկինում ժողովրդավարները բավական մեծ հակակրանք էին վայելում, ապա այժմ իրավիճակը կրկին փոխվում է, և Դեմոկրատական կուսակցությունը վերականգնում է իր դիրքերը։

Սակայն եթե դիտարկենք իրավիճակը գլոբալ համատեքստում, ապա էական ու արմատական փոփոխություններ չենք տեսնի։ Ինչո՞ւ։ Որովհետև Ամերիկան եղել և շարունակում է մնալ նախագահական հանրապետություն։ Իսկ նախագահական կառավարման համակարգի հիմնական առանձնահատկությունն այն է, որ պետական կառավարման առանցքային գործառույթները կենտրոնացած են Ամերիկայի Միացյալ Նահանգների նախագահի ձեռքում։

Միևնույն ժամանակ, ԱՄՆ նախագահը չի փոխվել։ Առնվազն առաջիկա երկու տարիներին նա հաստատ չի փոխվի։ Սա նշանակում է, որ ԱՄՆ ազգային քաղաքականության ընդհանուր ուղղությունն, ըստ էության, եղել է և շարունակում է մնալ նույնը»,- նշել է փորձագետը։

Անդրադառնալով ուկրաինական հակամարտությանը՝ քաղաքագետն ընդգծել է, որ այս ուղղությամբ ԱՄՆ քաղաքականության մեջ էական փոփոխություններ ակնկալել պետք չէ։

«Ուկրաինայի հարցում նույնպես ամեն ինչ մնում է նույնը։ ԱՄՆ-Ուկրաինա հարաբերություններում լուրջ փոփոխություններ ակնկալելու հիմքեր այս պահին չկան։ Եվս մեկ անգամ ընդգծեմ՝ պատճառն այն է, որ ԱՄՆ-ն նախագահական հանրապետություն է։ Երբ ԱՄՆ նախագահը փոխվի, և իշխանության գա դեմոկրատ նախագահ, այդ ժամանակ արդեն կարելի է խոսել բոլորովին այլ քաղաքական համատեքստի մասին։ Իսկ այս պահին նման փոփոխություններ չկան»,- եզրափակել է Դանիլա Գուրեևը։