Միշտ ամեն ինչ արել եմ խաղալու համար և տվել եմ 100%-ը. Հենրիխ Մխիթարյան

24 Հոկտեմբերի 2023, 16:10

Սպորտ

«Ինտերի» կիսապաշտպան Հենրիխ Մխիթարյանը խոսել է Չեմպիոնների լիգայի խմբային փուլի 3-րդ տուրում «ՌԲ Զալցբուրգի» հետ առաջիկա խաղի մասին։

«Ինչ-որ բան փոխվո՞ւմ է, երբ մենք խաղում ենք Չեմպիոնների լիգայում: Ոչինչ չի փոխվում, յուրաքանչյուր խաղ, իսկապես, կարևոր է մեզ համար։ Մենք հասկանում ենք, որ լավ չսկսեցինք «Ռեալ Սոսյեդադի» դեմ խաղում, բայց շատ լավ գործեցինք «Բենֆիկայի» դեմ, ուստի ցանկանում ենք շարունակել մեր ելույթը։

Մենք ավելի հուզված և պատրաստ ենք, քան երբևէ։ «Բենֆիկայի» դեմ մենք արդեն ցույց տվեցինք, որ ցանկանում ենք հաղթել այս հանդիպումներում, և Զալցբուրգի հետ խաղը բացառություն չի լինի: Մենք ամեն ինչ անելու ենք սրա համար։

Սպասու՞մ էի, որ կդառնամ թիմի կարևոր անդամ: Անցումային շրջանից առաջ, գլխավոր մարզչի հետ խոսելիս, ասացի, որ եկել եմ թիմին օգնելու և ամեն ինչ տալու՝ հանուն խաղի, բայց նա է որոշում կայացրել ընտրության մասին։ Ես միշտ ամեն ինչ արել եմ խաղալու համար և տվել եմ 100%-ը»,- «Ինտերի» պաշտոնական կայքի փոխանցմամբ՝ ասել է Մխիթարյանը: