Ամոթ հոգևորականներին հետապնդող իշխանությանը․ Մոսկվայում ակցիա է անցկացվել՝ հաջակցություն Ամենայն Հայոց Կաթողիկոսի

Մոսկվայում՝ Հայաստանի դեսպանատան առջև, տեղի է ունեցել ակցիա՝ հաջակցություն Ամենայն Հայոց Կաթողիկոս Գարեգին Բ-ի և Հայ Առաքելական Եկեղեցու ներկայացուցիչների։ Ակցիայի անցկացման առիթը նույն օրը Հայաստանում կայացած դատական նիստն էր՝ Կաթողիկոսի և վեց եպիսկոպոսների գործով։

Դիվանագիտական ներկայացուցչության առջև հավաքվել էին հարյուրավոր մարդիկ՝ հոգևորականներ, հավատացյալներ, հայկական սփյուռքի ներկայացուցիչներ և հասարակական գործիչներ։

Միջոցառումը սկսվել է միասնական աղոթքով։ Մասնակիցներն աղոթել են խաղաղության, արդարության և հայ ժողովրդի միասնության համար։

Ակցիան անցկացվել է «Ամոթ այն իշխանությանը, որը հետապնդում է հոգևորականներին» կարգախոսի ներքո։ Հավաքվածները ձեռքներին պահել են լուսանկարներ, պաստառներ և Հայաստանի դրոշն՝ իրենց աջակցությունը հայտնելով Հայ Առաքելական Եկեղեցուն։

«Մենք հավաքվել ենք՝ աջակցելու և աղոթելու Հայ Առաքելական Եկեղեցու հոգևորականների համար, որպեսզի Հայաստանի իշխանությունները դադարեցնեն ոչ միայն Կաթողիկոսի, այլև Եկեղեցու և մեր ժողովրդի դեմ ուղղված կործանարար գործողությունները», — հայտարարել է Հայ Առաքելական Եկեղեցու հոգևորական Գևորգ Վարդանյանը։

Կազմակերպիչների խոսքով՝ տեղի ունեցողը լուրջ անհանգստություն է առաջացնում ոչ միայն Հայաստանում, այլև երկրի սահմաններից դուրս բնակվող հայերի շրջանում։

«Այսօր մենք հավաքվել ենք՝ մեր աջակցությունը հայտնելու բոլոր հոգևորականներին, Կաթողիկոսին և քաղբանտարկյալներին, ինչպես նաև մեր անհամաձայնությունն արտահայտելու իշխանությունների գործողությունների վերաբերյալ», — նշել է թեմի՝ պետական և հասարակական կառույցների հետ փոխգործակցության ներկայացուցիչ Լևոն Մուքանյանը։

«Սա քաղաքացիական ակցիա է, որի նպատակն է ցույց տալ մեր դիրքորոշումը։ Մենք պետք է ապացուցենք, որ մինչև վերջ կանգնելու ենք մեր Կաթողիկոսի և Եկեղեցու կողքին», — ասել է հասարակական-քաղաքական գործիչ, «Եվրասիա» ինքնավար ոչ առևտրային կազմակերպության խորհրդի անդամ Միկա Բադալյանը։

Ակցիայի մասնակիցները կոչ են արել պահպանել ազգային միասնությունը, հարգել հայ հասարակության ավանդական ինստիտուտները և թույլ չտալ հասարակական պառակտման հետագա խորացումը։