Բագրատ Կնյազչյան. ՌԴ նավատորմի փոխծովակալը

Alpha News-ը շարունակում է ներկայացնել «Ալֆա պերսոնա» շարքը:

Բագրատ Կնյազչյանը ծնվել է 1933 թվականի ապրիլի 29-ին Կիրովաբադում։ Երկրորդ համաշխարհային պատերազմի դաժան տարիներին, այլ երեխաների հետ, նա ակտիվորեն օգնել է ռազմական օդաչուների ընտանիքներին, որոնք Դուգլաս ինքնաթիռները Կիրովաբադից տեղափոխում էին ռազմաճակատ։

1950 թվականին Կնյազչյանն ավարտել է ԽՍՀՄ ռազմաօդային ուժերի ռազմական վարժարանը։ 1952 թվականին ընդունվել է Վիբորգ քաղաքի ռազմածովային թիկունքի դպրոց, որը հաջողությամբ ավարտել է 1955 թվականին և ուղարկվել Կասպյան նավատորմ։
Կնյազչյանը սերժանտ-մայորից դարձել է ԽՄԿԿ անդամ, շուտով նշանակվել է նավատորմի նյութատեխնիկական ապահովման վարչատնտեսական բաժնի պետ և ստացել փոխգնդապետի կոչում։

Նա ասել է, որ ռազմածովային ծառայությունում փորձ ձեռք բերելու համար տեղափոխվել է նավի անձնակազմ, որտեղ Կնյազչյանը յոթ տարի ծառայել է որպես մատակարարման ծառայությունների պետ և դեսանտային նավի կազմավորման ափամերձ բազայի հրամանատարի տեղակալ։

1977 թվականին նշանակվել է նավատորմի հրամանատարի տեղակալ և Ռազմական խորհրդի անդամ, որտեղ ղեկավարել է 19 ծառայություններից 15-ը, այդ թվում՝ սպառազինության վարչությունը, տեխնիկական ծառայությունը, փրկարարական ծառայությունը։

Նավատորմում 34 տարի ծառայելուց հետո 1989 թվականին տեղափոխվել է Մոսկվա՝ զբաղեցնելով ռազմածովային նյութատեխնիկական ապահովման շտաբի պետի տեղակալի պաշտոնը՝ պատասխանատու կազմակերպչական, մոբիլիզացիոն և կադրային աշխատանքների համար։ 1993 թվականին՝ 60 տարեկանում, Կնյազչյանն անցել է թոշակի և այդ ժամանակվանից ակտիվորեն զբաղվել վետերանների հարցերով։

Վեց տարի նա ղեկավարել է Ռուսաստանի Դաշնության պաշտպանության նախարարության «Ծառայելով հայրենիքին» հասարակական հիմնադրամը՝ օգնություն տրամադրելով վետերաններին և զինվորականներին։ Կնյազչյանը դարձել է Ռուսաստանի Դաշնության հինգ հասարակական ակադեմիաների ակադեմիկոս, իսկ 2004 թվականին նրան շնորհվել է «Մոսկվա քաղաքի պատվավոր վետերան» կոչումը:

Բագրատ Կնյազչյանը պարգևատրվել է «Բարեկամության», «Կարմիր աստղի», «ԽՍՀՄ Զինված ուժերում հայրենիքին մատուցած ծառայության համար» 2-րդ և 3-րդ աստիճանի շքանշաններով, ինչպես նաև 30 մեդալներով և արտասահմանյան 7 պարգևներով․ «Պատվի և Արիության համար» երեք աստիճանի շքանշանով՝ Կովկասում տեղի ունեցող իրադարձություններին մասնակցելու համար։

Կնյազչյանը պարգևատրվել է նաև այլ պատվավոր շքանշաններով։

Ցավոք, այսօր՝ փետրվարի 24-ին, հայտնի դարձավ, որ 92 տարեկանում կյանքից հեռացել է Բագրատ Կնյազչյանը։